“Türk Dövlətləri Təşkilatına daxil olan ölkələr arasında təhsil və mədəni əlaqələr xüsusi əhəmiyyət daşıyır”.

“Azərbaycan müəllimi” xəbər verir ki, bu barədə Türk Dövlətləri Təşkilatının Baş katibi Kurbanıçbek Omuraliyev Qırğızıstan mediasına verdiyi müsahibədə bildirib. 

“Təhsil və mədəniyyət təşkilatımız üçün eyni dərəcədə vacibdir. Qırğızıstanın altı universiteti də daxil olmaqla türk cümhuriyyətlərindən 100-dən çox universiteti birləşdirən Türk Universitetləri Birliyinin yaradılması bunun bariz nümunəsidir. Bu əməkdaşlıq təkcə tələbə və müəllim mübadiləsini təşviq etmir, həm də ölkələrimiz üçün ümumi təhsil mühiti yaratmaqla vahid təhsil standartlarının həyata keçirilməsinə kömək edir”, - deyə o bildirib. 

K.Omuraliyev Bakıda təsdiq edilmiş ortaq türk əlifbasının yaradılmasını mühüm nailiyyətlərdən biri hesab edir: “Bu 34 hərfli əlifba dil irsimizi qorumağa və Türk xalqları arasında ünsiyyəti möhkəmləndirməyə kömək edəcək”.

Türk cümhuriyyətləri arasında ümumi türk əlifbasının tətbiqi məsələsinə toxunan Baş katib qeyd edir ki, ortaq bir əlifba haqqında danışarkən onun mahiyyətini anlamaq vacibdir: "Bu, milli əlifbaları əvəz etmək cəhdi deyil, xalqlarımız arasında anlaşmanın sadələşdirilməsi istiqamətində atılan addımdır. Dövlət səviyyəsində yazıları birləşdirməyə çalışmırıq, yalnız ölkələrimizdən olan insanların bir-birini daha asan başa düşməsinə kömək edəcək bir sistem qururuq. Bu məsələnin tarixi Bakıya gedib çıxır, burada ziyalılarımız, filoloqlarımız və tarixçilərimiz hələ bir neçə onilliklər əvvəl bu ideyanı müzakirə edirdilər. O dövrdə, indiki kimi, dillərimizi bir-birimizə daha əlçatan etmək idi. Məsələn, bir turistin işarələri oxumaqla daha asan gəzməsi və ədəbiyyatları daha aydın olması üçün. Beləliklə, əlifbadakı birlik mədəni yaxınlaşma üçün bir vasitədir, bunun arxasında heç bir gizli niyyət və ya alt mətnin olmadığını başa düşmək vacibdir”.

Qeyd edək ki, Türk Dövlətləri Təşkilatı artıq 15 ildir ki, fəaliyyət göstərir və beynəlxalq səviyyədə tamhüquqlu dövlətlərarası qurum kimi tanınıb. Təşkilat çərçivəsində iştirakçı ölkələr arasında əməkdaşlığın möhkəmləndirilməsinə yönəlmiş bir sıra layihələr həyata keçirilir. Qurumun üzvləri Azərbaycan, Qazaxıstan, Qırğızıstan, Türkiyə və Özbəkistandır. Macarıstan, Türkmənistan, Şimali Kipr Türk Respublikası və İqtisadi Əməkdaşlıq Təşkilatı (İƏT) müşahidəçi statusuna malikdir.