“Azərbaycan-Özbəkistan: ali təhsildə əməkdaşlığın inkişafında prioritet istiqamətlər” mövzusunda keçirilən Birinci Rektorlar Forumu çərçivəsində Bakı Mühəndislik Universiteti (BMU) ilə Özbəkistan Respublikasının üç aparıcı ali təhsil ocağı arasında əməkdaşlıq müqavilələri imzalanıb.

Universitetdən “Azərbaycan müəllimi”nə bildirilib ki, BMU ilə Andijan Texniki Universiteti, Andijan Kənd Təsərrüfatı və Aqrotexnologiya Universiteti, Səmərqənd Dövlət Universiteti arasında imzalanan əməkdaşlıq müqavilələri birgə müxtəlif ikili proqramların, elmi-tədqiqatların icrasını, o cümlədən tələbə, müəllim mübadiləsini və digər mühüm istiqamətləri əhatə edir.

Əndican şəhərində keçirilən forum Azərbaycan Respublikası ilə Özbəkistan Respublikası arasında əməkdaşlıq üzrə Birgə Hökumətlərarası Komissiyanın 13-cü iclasında nəzərdə tutulan tapşırıqların icrası və elm, ali təhsil sahəsində əlaqələrin genişləndirilməsi məqsədilə təşkil olunub. Tədbirdə elm və təhsil nazirinin müavini İdris İsayevin rəhbərlik etdiyi nümayəndə heyəti, hər iki ölkənin ali təhsil müəssisələrinin rəhbərləri iştirak ediblər.

Çıxışlar zamanı iki ölkə arasında elm və ali təhsil sahəsində əməkdaşlığın inkişaf etdiyi, eyni zamanda, forumun universitetlərarası tərəfdaşlıqların genişlənməsinə və birgə layihələrin təşviqinə töhfə verəcəyi bildirilib. Həmçinin sessiyalarda birgə əməkdaşlıq məsələləri geniş müzakirə olunub. Ardınca Azərbaycan universitetləri ilə Özbəkistanın aparıcı ali təhsil müəssisələri arasında əməkdaşlıq sənədləri imzalanıb.