Oktyabrın 10-da Elm və Təhsil Nazirliyinin Aparat rəhbəri Mətin Kərimli Mingəçevir Dövlət Universitetində (MDU) olub.

“Azərbaycan müəllimi” xəbər verir ki,  Aparat rəhbəri universitetin inşa olunan yeni kampus binasına baş çəkərək müasir təhsil şəraitinin yaradılması istiqamətində görülən işlərlə bağlı məlumat alıb.

Daha sonra Mətin Kərimli universitetdə tədris prosesini yerində izləyib, tələbələrlə görüşərək  dərslərdə iştirak edib. Tələbələrin suallarını cavablandıran Aparat rəhbəri onların gələcəkdə yüksəkixtisaslı mütəxəssislər kimi formalaşması üçün vacib tövsiyələr verib. O, tələbələrə əmək bazarının tələblərinə cavab verən bilik və bacarıqların qazanılmasının müasir təhsil sistemindəki önəmini vurğulayıb.

Mətin Kərimli Azərbaycan Respublikasının Prezidenti İlham Əliyevin təhsilin inkişafına göstərdiyi xüsusi diqqət və qayğını diqqətə çatdırıb. MDU-nun illik statistik göstəricilərinə nəzər salaraq tədris keyfiyyətinin ildən-ilə yüksəldiyini, bu inkişafın universitetin artan nüfuzunu göstərdiyini qeyd edib. Xüsusilə, Mingəçevir Dövlət Universitetinin regionda mühüm təhsil və elm mərkəzinə çevrildiyini və onun sosial-iqtisadi inkişafda oynadığı rolunu xüsusi vurğulayıb.

Mətin Kərimli, eyni zamanda,  Elm və Təhsil Nazirliyi tərəfindən ölkəmizdə  təhsilin keyfiyyətinin artırılması istiqamətində həyata keçirilən islahatlar barədə də danışıb. O, bu sahədə bir sıra əhəmiyyətli layihələrin icra edildiyini vurğulayıb. Bu islahatlar sırasında təhsilin məzmununun yenilənməsi, rəqəmsal texnologiyaların tədris prosesinə inteqrasiyası, müəllimlərin peşəkar inkişafı, şagirdlərin bilik və bacarıqlarının beynəlxalq standartlara uyğun olaraq qiymətləndirilməsi kimi mühüm addımlar xüsusi yer tutur.

Mətin Kərimli bildirib ki, bu islahatlar Azərbaycan təhsil sistemində köklü dəyişikliklərə səbəb olub və nəticədə ölkənin beynəlxalq təhsil reytinqlərində mövqeyi əhəmiyyətli dərəcədə yaxşılaşıb.

MDU-nun rektor vəzifəsini müvəqqəti icra edən, tədris məsələləri üzrə prorektoru Üzeyir Zeynalov isə çıxışında universitetin son illərdə qazandığı uğurlarından bəhs edərək, MDU-nun elmi potensialının sürətlə inkişaf etdiyini qeyd edib. Son illərdə 14 müəllimin fəlsəfə doktoru, 5 əməkdaşın isə dosent adını qazandığını bildirərək, bu uğurların universitetin elmi nailiyyətlərinin bariz nümunəsi olduğunu vurğulayıb. O, həmçinin, MDU-nun Ümummilli Lider Heydər Əliyev ideologiyasına sadiq bir təhsil müəssisəsi olaraq, 3000-dən çox tələbə və 300-dən artıq əməkdaş ilə qarşıya qoyulan məqsədlərə çatmaq üçün böyük səylə çalışdığını bildirib.

Səfər zamanı Mingəçevir Dövlət Universitetinin regionun inkişafında mühüm rol oynadığı və bu təhsil ocağının yüksəkixtisaslı kadrların hazırlanmasına, elmi potensialın gücləndirilməsinə verdiyi töhfələr xüsusilə vurğulanıb. Mətin Kərimli universitetin gələcək inkişaf strategiyasına dair tövsiyələrini bölüşərək, təhsilin davamlı inkişafı və tələbələrin dünya standartlarına uyğun mütəxəssislər kimi yetişməsi üçün konkret təkliflər irəli sürüb.