Aprelin 29-da Elm və  Ali Təhsil üzrə Dövlət Agentliyi (EATDA) ilə “Elsevier” arasında əməkdaşlıq çərçivəsində “Necə mükafat qazanan tədqiqatçı olmaq olar?” mövzusunda növbəti vebinar təşkil olunub.  

Vebinar iştirakçılarından Azərbaycan Memarlıq və İnşaat Universitetinin Strateji planlaşdırma şöbəsinin mütəxəssisi Nigar Abdullayeva EATDA və “Elsevier” tərəfindən müntəzəm olaraq təşkil olunan vebinarlarda iştirak edir. 2024-cü ilin iyul-oktyabr ayları ərzində keçirilən "Elmmetrik bazalar üzrə mütəxəssis hazırlığı" proqramını birinciliklə tamamlayaraq uğurlu iştirakçı olub. Bu proqrama müraciət edən 150 nəfərdən 70 nəfər iştirak hüququ qazansa da, yekunda yalnız 28 nəfər "Elsevier" və "Clarivate" şirkətlərinin birgə sertifikatını əldə edə bilib.

“Azərbaycan müəllimi”nə açıqlamasında Nigar Abdullayeva ölkəmizin elm və ali təhsil müəssisələrində çalışan gənc tədqiqatçıların iştirak etdiyi tədbiri yüksək qiymətləndirib:

– Düşünürəm ki, bu vebinar tədqiqatçılar üçün əhəmiyyətli töhfələr verdi. Əsas mövzulardan biri elmi işlərdə mükafata layiq görülmək üçün hansı xüsusiyyətlərə malik olmalı olduğumuz idi. Mənim kimi gənc tədqiqatçılar üçün xüsusilə faydalı olan bu vebinarda gələcək akademik karyeramızda uğur qazanmaq üçün diqqət etməli olduğumuz nüanslar vurğulandı. Vebinarda elmi-tədqiqatların düzgün istiqamətdə aparılması və daha keyfiyyətli nəticələr əldə edilməsi üçün atılması vacib olan addımlar da müzakirə edildi.

Həmçinin tədqiqatçıların elmi işlərinin təqdim edilməsinin vacibliyi vurğulandı. Elmi nəşrlərin keyfiyyətini artırmaq və onları beynəlxalq aləmdə tanıtdırmaq üçün müvafiq platformalarda necə nəşr edilməli olduğu barədə konkret məsləhətlər verildi. Bu məsləhətlər elmi işlərin beynəlxalq nəşrlərdə tanınmasının və elmi cəmiyyətə tanıdılmasının əhəmiyyətini göstərir. Mənim üçün bu tövsiyələr çox faydalı oldu, çünki elmi fəaliyyətimdə daha yüksək standartlara çatmaq istəyirəm. 
Vebinarın sonunda iştirakçılara elmi fəaliyyətləri daha təsirli etmək üçün praktik məsləhətlər təqdim olundu ki, bu məsləhətlər həmçinin elmi işlərin doğru auditoriyaya yönləndirilməsinin vacibliyini, doğru platformalarda yayımlanmasının əhəmiyyətini göstərir, tədqiqatçıların elmi işlərinin beynəlxalq səviyyədə görünürlüyünü artırmaq və tanınmaq üçün əhəmiyyətli alətlər təqdim edir. 

Fikrimcə, belə tədbirlər elmi fəaliyyətlərində uğur qazanmaq istəyən hər kəs üçün vacibdir. Mən də bu vebinarda əldə etdiyim bilikləri öz elmi işlərimdə tətbiq edəcəyəm. Bir daha belə faydalı tədbirləri həyata keçirdikləri üçün EATDA-ya və “Elsevier” şirkətinə öz təşəkkürümü bildirirəm.