Elmin sərhədsiz imkanları ekoloji problemlərə innovativ həll yolları tapmaqda əsas rol oynayır. Xüsusilə gənclərin elmə marağı və kiçik, lakin perspektivli layihələrə qoşulması bu prosesin vacib hissəsidir. Şəki-Zaqatala Regional Təhsil İdarəsinin dəstəyi ilə Şəki şəhər 6 və 18 nömrəli tam orta məktəblərinin şağirdləri bu il "Sabahın alimləri" müsabiqəsinə "Sellüloza üçün yeni həyat" adlı yenilikçi layihə ilə qatılıblar. Onların məqsədi mebel istehsalında dəyərsiz sayılıb yandırılan ağac yonqarlarını səmərəli şəkildə təkrar emal edərək ekoloji və iqtisadi baxımdan faydalı bir nəticə əldə etməkdir.

Layihənin mahiyyəti: tullantılardan səmərəli istifadə

Şəki şəhər 6 və 18 nömrəli tam orta məktəblərinin kimya müəllimi Samirə Allahverdiyeva uzun illərdir ki, şağirdlərin elmə marağını artırmaq və onları beynəlxalq müsabiqələrə hazırlamaq istiqamətində çalışır. Bu il Samirə müəllim iki fərqli məktəbin şağirdlərini bir komanda şəklində bir araya gətirərək "Sellüloza üçün yeni həyat" adlı layihəni işləyib. Bu təşəbbüs mebel sexlərində yandırılan ağac yonqarlarını toplayıb təkrar emal etməyi nəzərdə tutur. Məqsəd ekoloji problemlərin azaldılması və iqtisadi dəyər yaradacaq yeni istifadə sahələrinin açılmasıdır.

Layihədə iştirak edən şagirdlər kimya elminin yalnız nəzəri biliklərdən ibarət olmadığını, real problemlərin həllində mühüm rol oynadığını öyrəniblər. 6 nömrəli məktəbin 10-cu sinif şagirdi Sədaqət Yusifova kimyaya olan marağının uşaqlıqdan başladığını və gələcəkdə həkim olmağı planlaşdırdığını bildirir. 18 nömrəli məktəbin 11-ci sinif şagirdi Sadiq Allahverdiyev isə texnologiya sahəsində təhsilini Almaniyada davam etdirmək niyyətində olduğunu və bu layihənin dünya səviyyəsində genişləndirilə biləcəyini vurğulayır. Onların fikrincə, layihə təkcə bilik qazandırmaqla yanaşı, həm də praktiki təcrübə əldə etmək üçün mühüm imkan yaradır.

Hazırlıq prosesi

Komanda oktyabr ayından başlayaraq həm nəzəri, həm də praktiki tədqiqatlar aparır. Mebel tullantılarının toplanması, onların tərkibinin öyrənilməsi və emal üsullarının sınaqdan keçirilməsi əsas fəaliyyət istiqamətləridir. “Sabahın alimləri” müsabiqəsində uğur qazanmağın vacib şərtlərindən biri də təqdimat bacarığıdır. Samirə müəllim bu barədə deyir:

“Elmi araşdırma nə qədər yaxşı olsa da, onun təqdimatını doğru şəkildə qurmaq əsasdır. Şagirdlərimə öyrədirəm ki, münsiflərin diqqətini cəlb etmək üçün işi sadə dildə, lakin elmi əsaslarla izah etmək lazımdır. Bu bacarıqlar gələcəkdə onların peşə fəaliyyətində də çox faydalı olacaq”.

“Sellüloza üçün yeni həyat” layihəsi Şəki-Zaqatala Regional Təhsil İdarəsinin iki fərqli məktəbindən olan şagirdlərin bir araya gəlməsinin ən bariz nümunəsidir. Onların hədəfi yalnız qələbə qazanmaq deyil, eyni zamanda real ekoloji və sosial problemlərə praktiki həll yolları təklif etməkdir. 

Qeyd edək ki, Şəki-Zaqatala Regional Təhsil İdarəsinin tabeliyində olan məktəblərin şağirdləri tərəfindən hazırlanan 8 innovativ layihə "Sabahın alimləri" XIV Respublika Müsabiqəsinin finalına vəsiqə qazanıb.