Pekində keçirilən Qlobal Ağıllı Təhsil Konfransında təqdim olunan UNESCO-nun yeni hesabatında Şərqi Asiyada təhsilin rəqəmsal transformasiyası prosesində məktəb və təhsil sistemi rəhbərlərinin rolunun həlledici əhəmiyyət daşıdığı vurğulanıb.

“Azərbaycan müəllimi” xəbər verir ki, hesabatda Çin, Yaponiya və Cənubi Koreya təhsilin rəqəmsallaşdırılmasını öz modernləşmə strategiyalarının əsas istiqaməti kimi müəyyənləşdirildiyi qeyd olunub. Məsələn, Çin 2030-cu ilədək bütün ibtidai və orta məktəblərdə süni intellekt tətbiq etməyi planlaşdırır. Yaponiyada 2020-ci ildə məktəblərin cəmi 8 faizində istifadə olunan rəqəmsal dərsliklərin payı 2024-cü ildə 88 faizə çatıb. Cənubi Koreya isə 2028-ci ilədək süni intellektlə təchiz olunmuş dərslikləri bütün məktəblərdə istifadəyə verməyi planlaşdırır.

“Rəqəmsal texnologiyanın təhsildə dəyişmə sürəti fasiləsizdir. İslahatlarda insan amilinə xüsusi önəm verilməli, şagirdlərin maraqları birinci plana çəkilməlidir. Bu prosesdə məktəb və sistem rəhbərlərinin rolu çox böyükdür, lakin bəzən bu əhəmiyyət yetərincə qiymətləndirilməyib. Onların dəstəklənməsi ölkələr üçün vacibdir ki, texnologiyaya yönəlik siyasət nəticəsində təhsil daha çox şagirdyönümlü, davamlı və məqsədəuyğun olsun”, – deyə UNESCO-nun Qlobal Təhsil Monitorinqi Hesabatının direktoru Manos Antoninis bildirib.

Hesabatda bildirilir ki, rəqəmsal transformasiyanın effektiv idarə edilməsi üçün məktəb və sistem rəhbərlərinə daha çox müstəqillik, aydın qaydalar və peşəkar hazırlıq imkanları təqdim olunmalıdır. Təhsil rəhbərlərinin seçilməsi ilə bağlı dövlət siyasəti də texnologiyanın inkişafına uyğun olaraq dəyişdirilməli, məktəblərə texniki məsələlərdə dəstək üçün ixtisaslı heyət ayrılmalıdır.

Eyni zamanda, rəqəmsal transformasiyanın gedişatında bərabərsizliyin artmaması üçün təcrübə mübadiləsi və əməkdaşlıq təşviq edilməlidir. Məsələn, Çinin Qinhay əyaləti rəqəmsal baxımdan daha inkişaf etmiş Şanxay, Tsyansi və Çjetszyan bölgələri ilə tərəfdaşlıq quraraq bilik mübadiləsini gücləndirib.

Hesabatda əlavə olaraq təhsil sahəsində rəqəmsal məlumatların istifadəsi, izlənməsi və uyğunlaşdırılması ilə bağlı nümunələr də təqdim olunur. Çin artıq 32 əyalət platformasını vahid Milli Ağıllı Təhsil Platformasında birləşdirib. Yaponiya isə 2023-cü ildə Təhsil Məlumatları Standartı 4.0-ı qəbul edərək məktəblərlə bələdiyyələr arasında məlumat mübadiləsini asanlaşdırıb.

UNESCO xəbərdarlıq edir ki, rəqəmsal təhsil nəticələrinin monitorinqi yalnız yaxşı ilkin şəraitə malik bölgələrdə aparılarsa, bu, sosial bərabərsizliyi daha da dərinləşdirə bilər.