Süni intellektin sürətlə inkişaf etdiyi bir dövrdə məktəblərdə uşaqlara yalnız akademik biliklərin deyil, həm də yumşaq bacarıqların (soft skills) öyrədilməsi daha da vacib hala gəlir. 

“Azərbaycan müəllimi” xəbər verir ki, təhsil siyasəti üzrə professor və keçmiş məktəb müəllimi C.L.Stel məqaləsində məktəblərin artıq təkcə bilik öyrətməklə kifayətlənməməli, həm də şagirdlərin emosional savadlılığını, əməkdaşlıq bacarıqlarını və problem həll etmə qabiliyyətini gücləndirməli olduğunu yazıb.

Məqalədə vurğulanır ki, son yarım əsrdə ən yüksək maaşlı işlər, əsasən, elm və texnologiya sahəsindəki işlərə aiddir. Lakin generativ süni intellektin (AI) yayılması ilə bu tendensiya dəyişə bilər. Çünki artıq bəzi işəgötürənlər müəyyən peşələri süni intellekt ilə əvəz etməyi planlaşdırdıqlarını bildirirlər. Nəticədə gələcəkdə əmək bazarı daha az proqramçıya və baza səviyyəsinə malik analitik işçilərə ehtiyac duyacaq.

Mütəxəssislərin fikrincə, süni intellekt insan kimi kod yaza, mətn, şəkil və məlumat analizləri apara bilsə də, insan düşüncəsini və hisslərini başa düşmək qabiliyyətinə malik deyil. Bu səbəbdən insanlarla ünsiyyət, emosional savadlılıq, əməkdaşlıq, problemə yaradıcı yanaşma kimi yumşaq bacarıqlar daha da ön plana çıxacaq.

Professor bildirir ki, müəllimlər bu bacarıqları ənənəvi fənlərlə birlikdə öyrədə bilərlər. Məsələn, dərs sonunda şagirdlərdən yazılı “çıxış bileti” ("exit ticket") istənilə bilər. Onlarda yalnız öyrənilən mövzu deyil, həm də şagirdlərin gün ərzində başqasına yardım etməsi, çətin tapşırığı necə həll etməsi və s. haqqında yazmaları tələb oluna bilər. Bu həm akademik, həm də sosial-emosional öyrənməni dəstəkləyir.

Eyni zamanda müəllimlər şagirdləri cavabı əvvəlcədən məlum olmayan real problemlərin həllinə cəlb edə bilərlər. Məsələn, məktəb həyətində torpağın rütubətini ölçüb landşaft həlləri təklif etmək, sosial problemlərlə bağlı video kampaniyalar hazırlamaq və ya alternativ tarixi ssenarilər üzərində düşünmək kimi fəaliyyətlər şagirdlərdə yaradıcı və tənqidi düşünməni inkişaf etdirir.

Ekspertlərin sözlərinə görə, şagirdlər bəzən süni intellektdən istifadə edərək yazı işlərini ona həvalə edirlər. Lakin bu, yeni bacarıqların qazanılmasına mane olur. Ona görə də müəllimlər dərs prosesində ənənəvi üsulları qoruyaraq şagirdlərin yavaş-yavaş öyrənməsinə şərait yaratmalıdırlar.

Nəticə etibarilə süni intellekt dövründə məktəblərin əsas vəzifəsi şagirdlərə yalnız bilik deyil, həm də öz emosiyalarını idarə etmək, başqaları ilə əməkdaşlıq etmək və mürəkkəb problemlərə yaradıcı yanaşmaq bacarıqlarını öyrətməkdir. Professorun fikrincə, ən vacib bacarıq isə öyrənməni qısa yollardan üstün tutmağı, yəni işi süni intellektə tapşırmadan əvvəl onu özünün bacarmağını öyrənməkdir.