“Cəmiyyət və dünya olaraq iqlim böhranına qarşı hərəkətə keçmək üçün artıq vaxtımız azdır və gələcək nəsli gözləmək kimi imkanımız yoxdur”.

“Azərbaycan müəllimi” xəbər verir ki, bu fikirləri Bakıda Elm və Təhsil Nazirliyi və İslam Dünyası Təhsil, Elm və Mədəniyyət Təşkilatının (ICESCO) birgə təşkilatçılığı ilə keçirilən “Yaşıl təhsil” mövzusunda ilk regional konfransda Kembric Universitetinin Qlobal iqlim təhsili direktoru Kristina Ozdene səsləndirib.

“Biz 10-20 il gözləyə bilmərik ki, yeni nəsil yeni tədris proqramlarını mənimsəyərək iqlim dəyişiklikləri və ətraf mühit problemlərinə tam həssas olsun. Bu böhran artıq bizim qarşımızdadır”, – deyə o vurğulayıb.

Kristina Ozdene nümunə olaraq Mərkəzi Asiya regionundakı Aral dənizini göstərərək qeyd edib ki, dəniz demək olar ki, tamamilə quruyub və bu, region üçün böyük ekoloji fəlakətdir. 

“Bu bizə göstərir ki, problemləri daha da böyümədən, indi - bu gündən hər səviyyədə həll etməyə başlamalıyıq”, – deyə o əlavə edib.
O, bunun üçün ailələrdən tutmuş məktəblərə, müəllimlərdən valideynlərə, yerli bələdiyyələrdən milli təhsil siyasətinə qədər bütün sistemlərin birgə səylərinin vacib olduğunu qeyd edib. Kristina Ozdene bildirib ki, yalnız müxtəlif mexanizmlərin eyni anda işlədiyi bir yanaşma ilə vaxt itirmədən ətraf mühitin qorunmasına töhfə verə və daha böyük problemlərin qarşısını ala bilərik.

“Biz hər bir sahədə, təhsil müəssisələrində, evlərimizdə, icmalarda və siyasət planlamasında ekoloji cəhətdən məsuliyyətli addımlar atmalıyıq. Məktəblərdə müəllim və valideynlərin iştirakı ilə keçirilən layihələr, tullantıların idarə olunması və təkrar emal təşəbbüsləri, həmçinin geniş ictimaiyyətin məlumatlandırılması bu mübarizənin ayrılmaz hissəsidir”, – deyə o vurğulayıb.