“Azərbaycan Prezidentinin Elm və Təhsil Nazirliyinin tabeliyindəki elmi müəssisələrin fəaliyyətinin optimallaşdırılması və səmərəliliyinin artırılması ilə bağlı əlavə tədbirlər haqqında” 2025-ci il 4 aprel tarixli Sərəncamında qeyd olunub ki, bir sıra müəssisələr birləşdirilsin, bir neçəsi universitetlərin tərkibinə verilsin. Bir neçə gün bundan əvvəl də Nazirlər Kabineti tərəfindən həmin Sərəncamın həyata keçirilməsi ilə bağlı növbəti qərar imzalanıb. Bu qərarın nəticəsində artıq konkret tədbirlərin həyata keçirilməsi nəzərdə tutulur”. 

“Azərbaycan müəllimi” xəbər verir ki, bu fikirləri elm və təhsil nazirinin müşaviri Nicat Məmmədli Təhsil TV-nin “Təhsildəyik” verilişində səsləndirib. 

O bildirib ki, həmin Sərəncamda nəzərdə tutulan elmi-tədqiqat müəssisələrinin bir neçəsinin birləşdirilməsi, vahid mərkəzdə cəmləşdirilməsi, onların daha səmərəli fəaliyyətinin təşkil olunması, həmçinin bəzi elmi-tədqiqat müəssisələrinin, xüsusilə regionlarda olan elmi-tədqiqat müəssisələrinin universitetlərin tərkibinə verilməsi məsələsi qoyulub: 

“Eyni zamanda, bunların maliyyə məsələlərinin nəzərə alınması da göstərilib. Bu istiqamətdə işlər davam edir. Yəqin ki, bunların həyata keçirilməsi və aktuallaşması müəyyən müddət alacaq. Nazirlər Kabinetinin qərarında onların artıq publik hüquqi şəxs kimi iki ay ərzində nizamnamələrinin hazırlanması və digər hüquqi prosedur məsələlərinin həlli nəzərdə tutulur. Bu məsələlər Nazirlər Kabinetinin müəyyən etdiyi vaxtda həyata keçiriləcək. Amma eyni zamanda buradan irəli gələn digər məsələlər, məsələn, həmin elmi-tədqiqat müəssisələrində həyata keçirilən elmi işlərin yenidən nəzərdən keçirilməsi, onların müasir dövrün tələblərinə uyğun şəkildə formalaşdırılması, insan resurslarının dəyərləndirilməsi və s. bu məsələlər müəyyən qədər vaxt aparacaq”.
 
O qeyd edib ki, bu barədə dəqiq vaxt demək çətindir: “Amma elm elə bir sahədir ki, tələsməyi sevmir. Onun üzərində daha dərindən düşünərək çalışmaq lazımdır”.