Hər bir ölkənin özünəməxsus mədəni irsini, iqtisadi quruluşunu və sosial sistemini nəzərə alan, onlara hörmətlə yanaşan səmərəli siyasətlərin formalaşdırılması olduqca vacibdir. Çünki təhsil sahəsində həyata keçirilən islahatlar yalnız ümumi prinsiplərə əsaslanmamalı, hər bir ölkənin tarixi, dəyərləri, sosial reallıqları və inkişaf mərhələsinə uyğun şəkildə tənzimlənməlidir.

“Azərbaycan müəllimi” xəbər verir ki, bu fikirləri  Bakıda Elm və Təhsil Nazirliyi və İslam Dünyası Təhsil, Elm və Mədəniyyət Təşkilatının (ICESCO) birgə təşkilatçılığı ilə keçirilən “Yaşıl təhsil” mövzusunda ilk regional konfrans çərçivəsində təşkil edilən müzakirə zamanı İSESKO-nun 3-cü Təhsil Nazirləri Konfransının (2024) İcraiyyə Komitəsinin sədri Əhməd Albanyan səsləndirib.

O qeyd edib ki, bu baxımdan siyasətlərin inteqrasiyası, yəni milli strategiyalarla beynəlxalq təşəbbüslərin uyğunlaşdırılması mühüm əhəmiyyət daşıyır. Eyni zamanda, müəllimlərin səlahiyyətləndirilməsi, onlara yeni bacarıqların qazandırılması və bu dəyişikliklərin həyata keçirilməsində aparıcı rol oynamaları xüsusi vurğulanmalıdır:

“Çünki müəllimlər təhsil sisteminin əsas sütunlarıdır və onların iqlim dəyişikliyi, dayanıqlılıq, ekoloji şüur kimi sahələrdə maariflənməsi gələcək nəsillərin formalaşmasında həlledici rol oynayır”.

O əlavə edib ki, bununla yanaşı, icmaların prosesə cəlb olunması da vacibdir. Yerli icmaların iştirakı olmadan heç bir “yaşıl siyasət” və ya “yaşıl təhsil” təşəbbüsü real təsir göstərə bilməz:

“Uşaqlar məktəbdə öyrəndiklərini həyatlarına tətbiq etmək üçün ailə və cəmiyyət dəstəyi görməlidirlər”.