Sentyabrın 15-də “Bilik günü”ndə Göyçay rayonu Hümbət İsmayılov adına Qarabaqqal kənd tam orta ümumtəhsil məktəbinin açılış mərasimi keçirilib.

“Azərbaycan müəllimi” xəbər verir ki, mərasimdə Milli Məclisin deputatı Sabir Hacıyev, Heydər Əliyev Fondunun şöbə müdiri Cəmil Əliyev, Göyçay Şəhər İcra Hakimiyyətinin başçısı Natiq Ağayev, Mərkəzi Aran Regional Təhsil İdarəsinin müdiri Həmid Qasımov, idarə əməkdaşları, məktəbin müəllim və şagird kollektivi iştirak edib.

Açılış mərasimi Dövlət Himninin səsləndirilməsi ilə başlayıb, ölkəmizin ərazi bütövlüyü və suverenliyi uğrunda canını fəda etmiş qəhrəman şəhidlərimizin və Ulu Öndər Heydər Əliyevin əziz xatirəsi bir dəqiqəlik sükutla yad edilib.

Tədbirdə çıxış edənlər məktəblərin pedaqoji kollektivini və şagirdləri yeni dərs ilinin başlanması münasibətilə təbrik edib, onlara müvəffəqiyyətlər arzulayıblar. Bildirilib ki, müasir tələblərə uyğun inşa edilən bu məktəb binalarında tədrisin yüksək səviyyədə təşkili üçün zəruri şərait yaradılıb.

Məktəb 1176 şagird yerlikdir. Tədris binasında 55 sinif otağı, 6 laboratoriya, 2 texnologiya, 3 informatika otağı, kitabxana, 270 nəfərlik akt zalı, idman zalı, hərbi hazırlıq kabineti və məktəbəhazırlıq otağı var. Məktəbdə 897 şagird təhsil alır. Təhsil müəssisəsinin 81 nəfər pedaqoji, 16 nəfər texniki işçisi var.

Açılış mərasimindən sonra qonaqlar məktəbdə yaradılmış şəraitlə yaxından tanış olublar, sinif otaqlarına, fənn kabinetlərinə, idman və akt zalına baxış keçiriblər.