İyunun 18-dən keçirilən təhsilverənlərin sertifikatlaşdırılması prosesinin test imtahanı mərhələsində yüksək nəticə toplayanlar arasında Qarabağ Regional Təhsil İdarəsinin tabeliyindəki orta məktəblərin müəllimləri də var.

"Azərbaycan müəllimi" onların bir neçəsi ilə həmsöhbət olub.

Əvvəlcə imtahandan 56 bal toplayan Nilufər Məmmədli öz həyəcanını bizimlə bölüşür. Nilufər müəllim ilk dəfədir ki,  sertifikatlaşdırma imtahanında iştirak edir. O, Ağcabədi şəhəri 7 nömrəli tam orta məktəbdə riyaziyyat müəllimi kimi fəaliyyət göstərir: “İmtahanda nəticəm yüksək oldu. amma daha da yüksək ola bilərdi. Həyəcandan bir az diqqətsizlik etdim. Təcrübə toplamış oldum, belə deyək. Sertifikatlaşdırmanın müsbət cəhətləri çoxdur. Ən əsası, hər bir müəllim öz üzərində işləyir, inkişaf edir. İxtisas üzrə mövzulara hazırlaşmadım, lakin kurikulumdan eyni sözü deyə bilmirəm. Düşünürəm ki, müəllim hər zaman özünü inkişafa, yeniliklərə açıq olmalıdır".

Növbəti yüksək nəticə Bərdə şəhərində imtahan verən Nurlanə Hüseynovaya aiddir. O, 2021-2024-cü illərdə Laçın rayonunun 24 nömrəli ümumi orta məktəbində dərs deyib. 2024-cü ildən isə Xocalı rayonunun 1 nömrəli tam orta məktəbində riyaziyyat fənnini tədris edir. 

"İlk dəfədir ki, sertifikatlaşdırma  imtahanında iştirak edirəm. 50 ixtisas sualınının 47-nə və kurikulumdan 6 suala doğru cavab yazaraq 53 bal topladım. Suallarda o qədər də çətinliyim olmadı. Daha yüksək bal toplaya bilməməyimə səbəb vaxtı düzgün bölməməyimdir. Yəni daha sürətli şəkildə işləmək olardı".

Hazırda Füzuli rayonu Araz Dilağarda kənd tam məktəbində Azərbaycan dili və ədəbiyyat müəllimi kimi çalışan Hicran Əzimova imtahandan 52 bal toplayıb. O da ilk dəfədir ki, sertifikatlaşdırmada iştirak edir. 

"İmtahan həyəcanımı və nəticəmə görə sevincimi yəqin gəlişimdən də gördünüz. Hazırlıq təkcə sertifikatlaşdırma üçün deyil, hər vaxt lazımdır. Sualların arasında asan da, çətin də olanı vardı. Nəticəmə gəldikdə isə bəli, bu nəticəni gözləyirdim, gözlədiyim kimi də oldu".

Qeyd edək ki, bu region üzrə imtahanlar Ağcabədi şəhəri M.Aranlı adına 11 nömrəli və Bərdə şəhəri N.Nərimanov adına 3 nömrəli tam orta məktəblərdə keçirilib. İmtahanlarında mərkəzlər üzrə ümumilikdə 131 təhsilverən iştirak edib.