Bugünkü sertifikatlaşdırma imtahanında Gəncə şəhəri M.C.Paşayev adına 39 nömrəli tam orta məktəbin biologiya müəllimi Nərgiz Əliyeva 60 bal toplayaraq özünü peşəkar müəllim kimi bir daha sübut edib.

“Azərbaycan müəllimi” onunla bu uğura gedən yolu, müəllimlik fəlsəfəsini və qarşıya qoyduğu məqsədləri müzakirə edib.

"Səhvlərimi mütləq qeyd edir, həmin mövzulara yenidən qayıdırdım” 

Söhbətimizə imtahana hazırlıqla bağlı başlayırıq. Bu mərhələyə necə yanaşdığını, hansı resurslardan istifadə etdiyini soruşuruq:
“İmtahana hazırlaşmaq üçün çoxlu testlər işləyirdim. Səhvlərimi mütləq qeyd edir, həmin mövzulara yenidən qayıdırdım. Əsas məqsədim biliklərimi sistemləşdirmək və möhkəmləndirmək idi. Dərsliklə yanaşı, bir çox vəsaitlərdən, eləcə də internet resurslarından istifadə etdim. Xüsusilə son bir il ərzində həm fənn üzrə, həm də kurikulum üzrə hazırlıqlarımı dayandırmadım”.

“İxtisas sualları rahat idi”

Nərgiz Əliyeva etiraf edir ki, ixtisas sualları onun üçün çətin olmayıb. Lakin kurikulum hissəsi müəyyən çətinliklər yaradıb:
“60 bal toplayacağımı gözləmirdim. Düşünürdüm ki, kurikulum hissəsində səhvim olacaq. Amma gözlədiyim kimi olmadı. Özüm də nəticəmə bir az təəccübləndim”.

“Bu proses müəllimləri inkişaf etdirir”

Sertifikatlaşdırma imtahanlarının müəllimlərə təsiri barədə fikrini belə ifadə edir:

“Bu proses müəllimlərin inkişafına, sözün əsl mənasında, müsbət təsir edir. Sertifikatlaşdırma başlayandan sonra artıq hər kəs öz üzərində daha çox işləməyə başlayıb. Məncə, bu, təkcə bal toplamaq üçün yox, ümumi təhsil keyfiyyətinin artması üçün vacib addımdır”.

“Hədəfim dövlətimə layiqli övladlar yetişdirməkdir”

Peşəsinə ürəkdən bağlı olan bu müəllimin ən böyük hədəfi təkcə şəxsi uğurlar deyil, həm də Vətənə töhfə verən gənclər yetişdirməkdir:

“Hədəfim daha layiqli, savadlı, vətənpərvər övladlar yetişdirməkdir. Müəllim hər gün dərsinə hazır olmalıdır. Təkcə kitabla kifayətlənmək olmaz. Mövzunu dərindən öyrənmək, əlavə mənbələrdən istifadə etmək və daim araşdırma aparmaq lazımdır”.

“Enerji və motivasiya olmadan nəticə mümkün deyil”

Nərgiz xanım müəllimlikdə uğurun sirrini sadə, amma təsirli şəkildə ifadə edir:

“Müəllimin uşaqlarla yüksək enerji ilə işləməlidir. Müəllim istedadlı, bilikli ola bilər, amma əgər bu bilikləri sevgi və enerji ilə paylaşmırsa, nəticə alınmır. Buna görə də enerji vacibdir”.

“Biologiyanı uşaqlara həyatla əlaqəli şəkildə öyrədirəm”

Biologiyanın daha maraqlı və əyani şəkildə tədrisi üçün texnologiyadan da faydalanır:

“Biologiya həyatla birbaşa əlaqəli bir fəndir. Məktəbin əyani vəsaitlərindən istifadə edirəm. Şagirdlərimə evdə insan anatomiyasını 3D formatında öyrənməyə imkan verən proqramlardan istifadə etməyi tövsiyə edirəm. Onlar evdə baxır, dərsi daha yaxşı qavrayırlar”.

Nərgiz müəllim onu ruhlandıran səbəblərdən də danışır:

“Məni ən çox məsuliyyətli və öyrənməyi sevən, hər bir incəliyi dərk etməyə çalışan şagirdlər motivasiya edir. Onların verdiyi enerji və öyrənməyə olan marağı məni daha çox öyrənməyə sövq edir”.