"Azərbaycan Respublikasının Birinci vitse-prezidenti, Heydər Əliyev Fondunun Prezidenti Mehriban xanım Əliyevanın rəhbərliyi ilə ölkəmizin ictimai və sosial həyatında bir sıra mühüm və uğurlu layihələr həyata keçirilib. Bu layihələr Azərbaycanın sosial-iqtisadi inkişafına və cəmiyyətimizin rifahına əhəmiyyətli töhfələr verib. Heydər Əliyev Fondunun fəaliyyətində əsas prioritet istiqamətlərdən biri təhsil sahəsidir”.

“Azərbaycan müəllimi” xəbər verir ki, bunu "Zəkaların mübarizəsi" olimpiadasının final mərhələsində açılış nitqi ilə çıxış edən Heydər Əliyev Fondunun şöbə müdiri Cəmil Əliyev deyib.

O bildirib ki, Fond təhsilin inkişafı məqsədilə ölkənin bütün bölgələrində, hətta ən ucqar kəndlərində belə yeni məktəb binalarının tikintisinə və mövcud məktəblərin əsaslı təmirinə xüsusi önəm verir. Bu proqramların başlıca məqsədi şagirdlərimizin keyfiyyətli təhsil almasını təmin etməkdir:

“Fondun elm və təhsillə bağlı layihələri təkcə ölkə daxilində deyil, beynəlxalq miqyasda da həyata keçirilir. Məsələn, ötən ilin dekabr ayında Heydər Əliyev Fondunun vitse-prezidenti Leyla Əliyevanın iştirakı ilə Afrika qitəsində, Ruandanın paytaxtı Kiqali şəhəri yaxınlığında yerləşən bir məktəbə dəstək göstərildi. Həmin məktəbdə oxuyan şagirdlərə müxtəlif məktəb ləvazimatları təqdim olundu, məktəb ilk dəfə olaraq internetə çıxışla təmin edildi və müasir texnologiyalar üzrə biliklərin artırılması istiqamətində tədbirlər görüldü. Bu, Fondun beynəlxalq humanitar missiyasının uğurlu nümunələrindən biridir”.

O əlavə edib ki, Elm və Təhsil Nazirliyi ilə birgə həyata keçirilən "Zəkaların mübarizəsi" layihəsi də xüsusi qeyd olunmalıdır. Bu layihə çərçivəsində bilik və şahmat üzrə müsabiqələr təşkil olunub, onların regional və respublika mərhələləri uğurla başa çatıb. Mart və aprel aylarında keçirilmiş seçim turlarından sonra bu gün final mərhələsi baş tutur:

“Sözügedən tədbir şagirdlər arasında həm elmi biliklərin, həm də dostluq və sosial bacarıqların inkişafına yönəlib”.

O sonda əlavə edib ki, bu kimi təşəbbüslər ölkəmizin gələcəyinə, gənc nəslin inkişafına və intellektual potensialın artırılmasına mühüm töhfələr verir.