Bakı Mühəndislik Universitetinin (BMU) rektoru Yaqub Piriyevin rəhbərlik etdiyi nümayəndə heyəti Koreya Respublikasında səfərdədir.

Universitetdən “Azərbaycan müəllimi”nə verilən məlumata görə, BMU ilə İNHA Universiteti arasında icra olunan ikili diplom proqramı (İDP) üzrə Rəhbər Komitənin növbəti iclasında iştirak etmək məqsədilə gerçəkləşən səfər çərçivəsində iki ali təhsil ocağı arasında görüş keçirilib.

Görüşdə İNHA Universitetinin rektoru Cho Myeong Voo Azərbaycana son səfəri çərçivəsində ona göstərilən qonaqpərvərliyə görə təşəkkürünü bildirib. İki ölkə arasında inkişaf edən əlaqələrin möhkəmlənməsində təhsil sahəsində əməkdaşlığın xüsusi payının olduğunu vurğulayan rektor hazırda BMU-İNHA İDP çərçivəsində təhsil alan tələbələrin bu münasibətlərin gələcək inkişafında önəmli rol alacaqlarına inandığını bildirib.

BMU-nun rektoru Yaqub Piriyev səmimi görüşə və xoş sözlərə görə minnətdarlığını bildirib. Prezident İlham Əliyevin müvafiq Sərəncamı ilə təsdiq olunan “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”ndan danışan rektor bu sənəd çərçivəsində həyata keçirilən ikili diplom proqramlarının önəmini vurğulayıb. BMU-İNHA İDP-nin uğurlu icrası üçün indiyə qədər Azərbaycan dövləti tərəfindən atılan addımları qeyd edən Yaqub Piriyev həmçinin proqram üzrə sonuncu kursu Koreyada təhsil alan tələbələr üçün Dövlət İmtahan Mərkəzi tərəfindən onlayn formatda təşkil olunan magistraturaya qəbul imtahanlarına diqqət çəkib və yaradılmış şəraitə görə rektor Cho Myeong Vooya təşəkkürünü bildirib. Rektor çıxışının sonunda həmkarını Azərbaycana BMU-İNHA İDP tələbələrinin növbəti məzun gününə dəvət edib.

İclas qarşıda duran məsələlər, habelə gələcəkdə İDP-nin Süni intellekt və Data analitikası kimi ixtisaslar üzrə icrası istiqamətində fikir mübadiləsinin aparılması ilə davam edib.

Görüşdən sonra Azərbaycan nümayəndə heyəti üçün təşkil olunan sahə gəzintisində İNHA Universitetinin maddi-texniki bazası barəsində ətraflı məlumat verilib.