Məktəbəqədər və Ümumi Təhsil üzrə Dövlət Agentliyi məktəbəhazırlıq qruplarına cəlb olunmuş uşaqların I sinfə qəbul qaydasını açıqlayıb.

Agentlikdən “Azərbaycan müəllimi”nə verilən məlumata görə, sistem Azərbaycan bölməsi üzrə məktəbəhazırlıq qruplarına cəlb olunmuş uşaqlar üçün birinci sinfə qəbulla bağlı avtomatik sorğu yerləşdirəcək. Bu zaman uşağın həmin bölmə üzrə hazırda təhsil aldığı ümumi təhsil müəssisəsi və müəllim seçiləcək.

Tədris digər dillərdə aparılan məktəbəhazırlıq qruplarına cəlb olunmuş uşaqların valideynləri (qanuni nümayəndə) isə mayın 6-dan şəxsi kabinetinə daxil olmalı, müsahibə mərkəzini seçərək övladının müsahibəyə yazılmasını təmin etməlidirlər. Sonra isə müsahibə nəticəsi məqbul hesab edilən uşaqlar üçün sistem tərəfindən həmin bölmə üzrə birinci sinfə avtomatik sorğu yerləşdiriləcək. Bütün bunlardan sonra valideyn şəxsi kabinetdən müvafiq ərizəni çap edərək məktəbə təqdim etməlidir.

Bəs övladı üçün sistem tərəfindən 1-ci sinfə avtomatik sorğu yerləşdirilmiş valideynə həmin ümumi təhsil müəssisəsini dəyişmək imkanı verilirmi?

Agentlikdən deyilib ki, bu halda valideyn şəxsi kabinetində “Sorğunu sil” düyməsini sıxaraq digər ümumi təhsil müəssisəsini seçə bilər.
Qeyd edək ki, 1 may saat 11:00-dan etibarən 2025–2026-ci tədris ili üzrə ümumi təhsil müəssisələrinin birinci siniflərinə şagird qəbuluna start verilir. Qəbul prosesi www.mektebeqebul.edu.az portalı vasitəsilə aparılacaq. Bu il Azərbaycan bölməsi üzrə 85 minə yaxın uşaq məktəbəhazırlıq qrupundan avtomatik olaraq I sinfə keçiriləcək.