Şəki-Zaqatala Regional Təhsil İdarəsinin tabeliyində fəaliyyət göstərən Balakən rayonu Vətən Müharibəsi Qəhrəmanı Amin Novruzov adına Humanitar və texniki təmayüllü liseyin XI sinif şagirdi Şahin Məmmədov martın 9-da keçirilmiş buraxılış imtahanında maksimum nəticə – 300 bal toplayaraq region birincisi olub.

İmtahan nəticəsi ilə bağlı danışan Şahin qeyd edir ki, bu uğur təkcə onun deyil, həm də ona daim dəstək olan valideynlərinin, bilik və bacarıqlarını formalaşdıran müəllimlərinin birgə zəhmətinin nəticəsidir: “Vətən Müharibəsi Qəhrəmanı Amin Novruzovun adını daşıyan liseyin şagirdi olaraq 300 bal toplamaq mənim üçün həm fəxr, həm də məsuliyyətdir”.

Şahinin uğurları bu nəticə ilə məhdudlaşmır. O, təhsil illəri ərzində müxtəlif intellektual yarış və fənn olimpiadalarında da parlaq göstəricilər əldə edib. 2021-ci ildə STEAM Azərbaycan Festivalında II yer, bu il “Sabahın alimləri” XIV layihə müsabiqəsində bürünc medal, 2024-cü ildə “Zəfər Elm Olimpiadası”nda (ŞZRTİ) I yer, 2025-ci ildə eyni olimpiadada III yeri tutub.

Şahin 9-cu sinifdə oxuyarkən DİM-in buraxılış imtahanında 261 bal toplayıb və fərqlənmə attestatına layiq görülüb. 
Şahin deyir ki, gələcəkdə Azərbaycan Tibb Universitetində “Müalicə işi” ixtisası üzrə ingilis dilində təhsil almağı və həkim kimi ölkəsinə xidmət etməyi qarşısına məqsəd qoyub.

Lisey rəhbərliyi və müəllim kollektivi bu uğuru məktəbin tədris nailiyyətlərinin bariz nümunəsi kimi dəyərləndirir. Onun nəticəsi bölgə təhsilindəki inkişafın və potensiallı gənclərin üzə çıxarılmasının göstəricisidir.