Oktyabrın 10-da Mingəçevir şəhəri İ.Kişiyev adına 17 nömrəli məktəbin inzibati binasının açılışı olub.

"Azərbaycan müəllimi" xəbər verir ki, açılışda Elm və Təhsil Nazirliyinin Aparat rəhbəri Mətin Kərimli iştirak edib. Tədbirə Mingəçevir şəhər icra hakimiyyətinin başçısı İlham İsmayılov, Mərkəzi Aran Regional Təhsil idarəsinin müdiri Elçin Kərimov, Mingəçevir şəhər Təhsil sektorunun müdiri Sevinc Əliyeva, rayon təhsil şöbəsinin əməkdaşları, məktəbin müəllim-şagird kollektivi və valideynlər qatılıb.

Elm və Təhsil Nazirliyinin Aparat rəhbəri Mətin Kərimli tədbirdə çıxış edərək bildirib ki, Elm və Təhsil Nazirliyinin əsaslı təmir etdiyi məktəb binasında 1200 şagirdin təhsil alması üçün lazımi şərait yaradılıb. O, ümumiyyətlə, ölkə ərazisində, o cümlədən işğaldan azad olunmuş torpaqlarda tikilən, əsaslı təmir edilən məktəblərlə bağlı da məlumat verib, dövlətin diqqət və qayğısı sayəsində bütün təhsil müəssisələrində belə yüksək şərait yaradılacağına inandığını deyib. Aparat rəhbəri şagirdlərin yüksək səviyyədə təhsil almaları üçün müəllim və valideynlər arasında sıx əlaqənin vacibliyini də vurğulayıb.

Sonra tədbir iştirakçıları məktəb binasında yaradılan şəraitlə tanış olublar.

Mətin Kərimli məktəbin olimpiada və müxtəlif beynəlxalq müsabiqələrdə uğur qazanmış qalib şagirdləri ilə də görüşüb. O, qazanılan uğurlarda müəllimlərin rolunu xüsusi qeyd edib. Hər şagirdin gələcəyin yüksək ixtisaslı peşə sahibi olacağına inandığını bildirərək onlara uğur arzulayıb.

Qeyd edək ki, I.Kişiyev adina 17 nömrəli tam orta məktəbin 1176 şagird yerlik yeni binasında 57 sinif otağı, 2 informatika kabineti, 2 idman zalı, 1akt zalı var. Hazırda məktəbdə 543 şagird təhsil alır. Təşkil edilən 25 sinif komplektindən biri  peşə təmayüllüdür. Məktəbdə 48 nəfərdən ibarət pedaqoji heyət çalışır, texniki işçilərin sayı 20 nəfərdir.

Aynur QULİYEVA,
Mərkəzi Aran regionu üzrə təmsilçi