“Müasir metodist” layihəsi çərçivəsində 3 aprel tarixində Təhsil İnstitutunun Metodik Dəstək Mərkəzi tərəfindən “Oxuyub-anlama bacarıqlarının inkişafı” mövzusunda vebinar təşkil edilib.

“Azərbaycan müəllimi” xəbər verir ki, vebinarda ümumi təhsil müəssisələrində metodik xidmətin təşkili üzrə fəaliyyət göstərən metodistlər iştirak ediblər.

Vebinar çərçivəsində şagirdlərin oxu bacarıqlarının təkmilləşdirilməsi istiqamətində metodistlərlə informasiya mübadiləsi aparılıb, oxu bacarıqlarının formalaşdırılmasına dair strategiyalar və üsullar, müxtəlif növlü mətnlər üzərində tənqidi düşünmə bacarıqlarının formalaşdırılması, oxu prosesində diqqət ediləcək məqamların təhlili, tapşırıqların tətbiqi ilə bağlı müzakirə aparılıb.

Eyni zamanda, vebinar iştirakçıları oxuyub-anlama bacarıqlarının formalaşdırılması prosesində qarşılaşdıqları çətinlikləri, bu problemlərin həlli istiqamətində tətbiq etdikləri yanaşmaları, şəxsi təcrübələrini paylaşaraq praktik bilik bazasını gücləndiriblər.

Vebinarın sonunda oxuyub-anlama bacarıqlarının şagirdlərin akademik nailiyyətlərinə və təhsilin keyfiyyətinə bilavasitə təsir etdiyi vurğulanaraq, metodistlərin bu istiqamətdə müasir yanaşmaları mənimsəmələrinin və tətbiq etmələrinin vacibliyini qeyd olunub.

Qeyd edək ki, “Müasir metodist” layihəsi çərçivəsində həyata keçirilən fəaliyyətlər metodistlərin peşəkar inkişafını dəstəkləməklə yanaşı, ümumi təhsil müəssisələrində tədrisin keyfiyyətinin artırılması və şagirdlərin akademik uğurlarının yüksəldilməsini hədəfləyir. Bu istiqamətdə metodistlər üçün aktual olan mövzular əsasında yeni vebinarların keçirilməsi planlaşdırılır.