268 nömrəli Xüsusi Təhsil Məktəbində Elm və Təhsil Nazirliyi yanında İctimai Şuranın üzvləri və Milli Məclisin deputatı Ceyhun Məmmədovun iştirakı ilə Autizm Maarifləndirmə Günü münasibətilə əhəmiyyətli bir tədbir keçirilib.

"Azərbaycan müəllimi" xəbər verir ki, tədbirdə millət vəkili Ceyhun Məmmədov, Elm və Təhsil Nazirliyi yanında İctimai Şuranın sədri Hikmət Əlizadə, İctimai Şuranın katibi Günay Əkbərova və Şuranın üzvü Sevinc Məhməliyeva, eləcə də müxtəlif qurumların nümayəndələri, pedaqoqlar və valideynlər iştirak ediblər.

Açılış nitqi ilə çıxış edən 268 nömrəli Xüsusi Təhsil Məktəbinin direktoru Farizə Teymurzadə məktəbin fəaliyyəti və xüsusi təhsilin əhəmiyyəti barədə məlumat verib. O, pedaqoji heyətin xüsusi qayğıya ehtiyacı olan uşaqlara göstərdiyi diqqət və qayğının, onların inkişafı üçün tətbiq edilən müasir metodların vacibliyini vurğulayıb.

Milli Məclisin deputatı Ceyhun Məmmədov ölkəmizdə xüsusi təhsilin inkişafı istiqamətində həyata keçirilən layihələrdən bəhs edərək, dövlətin bu sahəyə xüsusi önəm verdiyini bildirib.

İctimai Şuranın sədri professor Hikmət Əlizadə isə çıxışında xüsusi təhsil sahəsində həyata keçirilən islahatların vacibliyini vurğulayaraq, cəmiyyətin bu prosesdə daha fəal iştirak etməsinin əhəmiyyətini qeyd edib.

İctimai Şuranın katibi, inklüziv təhsilin inkişafına dair bir sıra layihələrə rəhbərlik edən Günay Əkbərova çıxışında xüsusi təhsilin cəmiyyətin rifahı üçün mühüm əhəmiyyət kəsb etdiyini vurğulayıb. O, müəllimlərin və valideynlərin üzərinə düşən məsuliyyəti vurğulayaraq bu sahədə maarifləndirmənin və peşəkar hazırlığın artırılmasının vacibliyini qeyd edib. Elm və Təhsil Nazirliyi yanında İctimai Şuranın üzvü Sevinc Məhməliyeva inklüziv təhsil sisteminin təkmilləşdirilməsinin yalnız xüsusi qayğıya ehtiyacı olan uşaqlar üçün deyil, bütövlükdə cəmiyyətin sosial inkişafı üçün mühüm olduğunu bildirib.

Tədbir çərçivəsində pedaqoqlar, defektoloqlar və loqopedlər də müzakirələrdə fəal iştirak ediblər. Onlar autizmli uşaqlar üçün təhsil imkanlarının genişləndirilməsi, müəllimlərin peşəkar inkişafı və yeni metodların tətbiqi ilə bağlı fikir mübadiləsi aparıblar.

Sonda valideynlərin sualları cavablandırılıb.