Təhsil İnstitutunun Metodik Dəstək Mərkəzi (ARTİ MDM) tərəfindən icra olunan “Müasir metodist” layihəsi çərçivəsində müsahibə mərhələsinə yenidən start verilir.

İnstitutdan “Azərbaycan müəllimi”nə bildirilib ki, layihənin məqsədi təhsil sistemində müasir metodiki yanaşmaların tətbiqini genişləndirmək, pedaqoji kadrların peşəkar inkişafını dəstəkləmək və nəticə etibarilə təhsilin keyfiyyətinə töhfə verməkdir.

Seçim prosesi mərhələli şəkildə həyata keçirilir. İkincə dəfə elan olunan müsabiqəyə fizika, kimya, informatika, coğrafiya və biologiya fənləri olmaqla 588 nəfər namizəd müraciət edib. İlkin dəyərləndirmədən keçərək tələblərə uyğun hesab edilən namizədlər 22 iyul 2025-ci il tarixdən müsahibəyə dəvət olunacaqlar. Müsahibələrin əsas məqsədi namizədlərin peşəkar kompetensiyalarını əhatəli şəkildə qiymətləndirməkdir.

Müsahibə zamanı namizədlər aşağıdakı meyarlar üzrə dəyərləndiriləcək:

• Özünü təqdimetmə bacarığı;
• Proqram üzrə dərs icmalının təqdimatı;
• Təhsilalanların qiymətləndirilməsi ilə bağlı yanaşmalar;
• Pedaqoji prosesin təşkili üzrə bilik və bacarıqlar;
• Ünsiyyət və əməkdaşlıq bacarıqları.

Qeyd edək ki, ikinci meyar çərçivəsində namizədlər ixtisaslarına uyğun bir dərs planı hazırlamalı və onun planlaşdırılmasına dair əsaslandırılmış izah təqdim etməlidirlər.

Bundan əlavə, namizədlərin liderlik qabiliyyətləri və problem həllinə yanaşmaları fərqli situasiya nümunələri və praktiki tapşırıqlar əsasında qiymətləndiriləcək.

Nəzərinizə çatdıraq ki, müsahibə mərhələsindən uğur qazanan namizədlər 28 iyuldan təlimlərə cəlb olunacaqlar.