“Post-it” kağızları ilk baxışda sadə ofis ləvazimatı kimi görünsə də, tədris prosesində innovativ və interaktiv metod kimi istifadə edilir. “Post-it” pedaqogikası öyrənməni vizuallaşdıran, yaradıcı düşüncəni inkişaf etdirən və aktiv iştirakçılığı təşviq edən yanaşmadır.

Son illərdə ali təhsildə texnologiyanın rolu geniş müzakirə mövzusuna çevrilib. Pandemiya dövründə onlayn tədris alətlərinin istifadəsi zərurətə çevrilsə də, bəzi müəllimlər tələbələrin diqqətini yayındırdığı üçün texnologiyadan uzaqlaşmağa üstünlük verirlər. 

İngilis dili professoru Keyt Nesbit rəqəmsal vasitələrə həddindən artıq etibar etməyin dərs zamanı öyrənənlərin sinif mühitindən uzaqlaşmasına səbəb ola biləcəyini qeyd edir. O, öyrənənlərin diqqətini cəmləmək və dərsə daha aktiv qoşulmalarını təmin etmək üçün aşağı texnologiyalı alternativlər axtarmağa başlayıb. Belə vasitələrdən biri də “Post-it” qeydləridir. 

Nesbit və psixologiya professoru Erik Emons “Post-it” qeydlərindən istifadə edərək dərs prosesini daha interaktiv və maraqlı etməyin bir neçə üsulunu təklif edirlər: 

• Yazı yazmağın qarşısında duran əngəlləri qaldırmaq: Tələbə və şagirdlər mövzuyla bağlı fikirlərini “Post-it” kağızlarında yazır və onları qruplaşdıraraq çevik bir plan hazırlayırlar. 

• Plakat sessiyalarında rəy bildirmək: Tələbə və şagirdlər bir-birinin təqdimatlarına “Post-it” vasitəsilə şərhlər yazır. 

• Səssiz diskussiya metodu: Hər kəs cavabını yazıb lövhəyə yapışdırır və müəllim bu qeydləri müzakirəyə açır. 

• Anlayış səviyyəsini yoxlamaq: Tələbə və şagirdlər mövzunu nə qədər yaxşı başa düşdüklərini “Post-it” qeydləri ilə vizual şəkildə göstərirlər. 

• Emosional oxu təhlili: Bir məqalə və ya kitab oxuyarkən öyrənənlər ən çox təsirləndikləri hissələri qeyd edib lövhədə paylaşırlar. 

• Testə hazırlıq oyunu: Kurs anlayışları “Post-it”lərdə yazılır və tələbələr bir-birinə suallar verərək öz anlayışlarını tapmağa çalışırlar. 

Bu metodlar tələbələrin aktiv iştirakını təşviq edir, onların bir-biri ilə ünsiyyətini artırır və sinifdə texnologiyadan asılılığı minimuma endirir. “Post-it” qeydləri kimi sadə vasitələrlə interaktiv və məhsuldar tədris mühiti yaratmaq mümkündür. 

Mənbə: https://www.insidehighered.com/opinion/career-advice/teaching/2025/01/31/post-it-terrific-low-tech-teaching-tool-opinion