Bu gündən 2025/2026-cı tədris ili üçün “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” çərçivəsində bakalavriat, magistratura və doktorantura səviyyələri üzrə müraciət edən namizədər üçün müsahibə mərhələsinə start verilib.

Bununla bağlı Dövlət Proqramı İdarəetmə Qrupunun rəhbəri Turan Topalova bu gün mətbuata açıqlamasında geniş məlumat verib.

T.Topalova qeyd edib ki, proqrama sənəd qəbulu uğurla başa çatıb. Növbəti mərhələ olaraq namizədlər müsahibə mərhələsinə dəvət olunublar. Müsahibə 3 ekspertin iştirakı ilə həyata keçirilir.

“Azərbaycan müəllimi” müsahibə mərhələsində iştirak edən namizədlərdən Orxan Məmmədli ilə görüşərək prosesin gedişatı ilə maraqlanıb.

- “Xaricdə təhsil almaq üçün Dövlət Proqramının müəyyən etdiyi vaxt ərzində qəbul almış olduğum "Dövlət idarəetməsi” ixtisası üzrə müvafiq sənədlərlə müraciət etmiş, Proqramın aidiyyəti tələblərini yerinə yetirdiyim üçün müsahibəyə dəvət olunmuşam. Artıq müsahibə az əvvəl baş tutdu. Proses kifayət qədər maraqlı suallarla müşayiət olunurdu. Müsahibə Dövlət Proqramının müsahibə qaydalarında da qeyd olunduğu kimi qəbul alınmış ixtisas və digər aidiyyəti məsələlər ətrafında aparıldı. Proses kifayət qədər şəffaf, müəyyən edilmiş qaydalara uyğun keçirilir. Düşünürəm ki, suallara bacardığım qədər cavab verə bilmişəm. Ümid edirəm, nəticələr müsbət olar”.

Orxan Məmmədli bundan əvvəl xaricdə qısamüddətli proqramlarda iştirak edib. Lakin bu təcrübələr elmi dərəcə almaq məqsədini daşımayb. “İndi isə, xaricdə təhsil üzrə Dövlət Proqramının gənclərə təqdim etdiyi bu imkanı dəyərləndirməyi və xaricdə təhsil alaraq ölkəmizə qayıdıb onun davamlı inkişafına bacardığım töhfəni, faydanı verməyi nəzərdə tuturam”. 

O, proqramın gənclərin akademik və peşəkar karyeralarında rolunun böyük olduğunu bildirir: “Əlbəttə, bu proqram dövlət tərəfindən gənclər üçün yaradılmış əvəzsiz bir fürsətdir. Burada, namizədlərə ölkəmizin bu günü və gələcəyi üçün ən əhəmiyyətli 15 ixtisas üzrə dünyanın ən nüfuzlu, ən reytinqli universitetlərində təhsil almaq imkanları verilir. Düşünürəm ki, bu, həm namizədin özü, həm də namizədin ölkəmizin davamlı və dayanıqlı inkişafına verəcəyi fayda baxımından əhəmiyyətli bir proqramdır. İnanıram ki, qalib olan bütün namizədlər bu proqramın dəstəyindən yararlanaraq xaricdə təhsil aldıqdan sonra ölkəyə qayıdıb öz sahələrində Azərbaycanın davamlı inkişafına mühüm töhfələrini verəcəklər”.