Qarabağ Universiteti 2025/2026-cı tədris ilində abituriyentlər üçün təbliğat kampaniyasına başlayıb.

Universitetdən “Azərbaycan müəllimi”nə bildirilib ki, ilk görüşlər Bakı şəhərində yerləşən Nizami rayon Milli Qəhrəman M.Rüstəmov adına 32 nömrəli tam orta məktəb və Kimya-biologiya təmayüllü Respublika liseyində keçirilib.

Görüşdə Qarabağ Universitetinin Humanitar və sosial elmlər fakültəsinin dekanı Elmar Mustafayev, İctimaiyyətlə əlaqələr şöbəsinin müdiri Aytən Quliyeva, İncəsənət fakültəsinin kafedra müdiri Arslan Növrəsli, Beynəlxalq Dil Mərkəzinin müəllimi Aytac Yolçuyeva və abituriyentlər iştirak ediblər.

Görüşlərdə təqdimatla çıxış edən universitet nümayəndələri universitetin tədris proqramları, fakültələr, ixtisaslar, Beynəlxalq Dil Mərkəzinin fəaliyyəti barədə ətraflı məlumat veriblər.

Görüşdə həmçinin Qarabağ Universitetinə tələbə qəbulu ilə bağlı maarifləndirici söhbət aparılıb, universitetin üstünlükləri, tədris prosesi, müəllim heyəti, təqaüd imkanları, yataqxanası və digər müvafiq məsələlər barədə ətraflı məlumat verilib.