20 may 2025-ci il tarixində “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində Bərdə Dövlət Peşə Təhsil Mərkəzində qısamüddətli təlimləri uğurla başa vuran müdavimlərə görüş keçirilib. 

“Azərbaycan müəllimi” xəbər verir ki, tədbirin məqsədi təlimləri uğurla başa vuran şəxslərə dövlət nümunəli sertifikatların təqdim edilməsi olub. Aqronom-texnik, qazanxana maşinisti, aşpaz və bərbər ixtisasları üzrə təlimləri uğurla başa vuran 61 müdavimə sertifikat təqdim olunub.

Qeyd edək ki, Bərdə Dövlət Peşə Təhsil Mərkəzində aqronom/texnik, aşpaz, avtomobil diaqnostikası və təmiri ustası, baytar köməkçisi, bərbər, elektirik-qaz qaynaqçısı, geniş profilli traktorçu-maşinist-təmirçi-çilingər, kənd təsərrüfatı maşın və avadanlıqlarının təmiri üzrə çilingər, mühasib, qazanxana maşinisti, bağban dekorator, isitmə-soyutma, havalandırma sistemləri və avadanlıqları ixtisasları üzrə qısamüddətli təlimlər keçirilir. Cari ildə Bərdə şəhərində məskunlaşan 164 nəfər məcburi köçkün bu təlimlərə cəlb edilib. Təlimlərin müddəti təlim proqramlarının tələblərinə uyğun olaraq 1 aydan 3 ayadək müəyyən edilir. Təlim proqramları nəzəri biliklərin və praktik bacarıqların inteqrasiyası əsasında hazırlanıb. Təlimlərin əsas məqsədi Böyük Qayıdışa dair I Dövlət Proqramı çərçivəsində işğaldan azad edilmiş ərazilərə qayıdan əhalinin kvalifikasiyalarının artırılması yolu ilə davamlı məşğulluğunun təmin edilməsidir. Təlimləri uğurla başa vuran şəxslərə əmək fəaliyyətinə başlamağa imkan verən dövlət nümunəli sertifikat təqdim edilir.

Ümumilikdə, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində keçirilən qısamüddətli təlimlər 8 peşə təhsil müəssisəsində  42 ixtisas üzrə keçirilir. Proqram çərçivəsində 2024-cü ildə 215 nəfər, 2025-ci ildə isə 526 nəfər təlimlərə cəlb olunub. Müvafiq sahələr üzrə yeni bilik və bacarıqlara yiyələnmək istəyən məcburi köçkünlər portal.edu.az platforması vasitəsilə qeydiyyatdan keçərək iştirak edə bilərlər.

Tədbir çərçivəsində “Qarabağa peşənlə qayıt” videoçarxının təqdimatı da baş tutub. Videoçarxın qəhrəmanı, “Elektrik avadanlıqlarının quraşdırılması və istismarı” ixtisası üzrə təhsil almış və hazırda Qarabağda elektrik kimi fəaliyyət göstərən Toğrul Dadaşzadə qazandığı nəzəri və praktik biliklərin real layihələrdə tətbiqindən və təhsilinin onun peşəkar inkişafına verdiyi töhfələrdən bəhs edib.