“İnklüziv təhsilin uğurla tətbiqində təhsilverənlərin rolu danılmazdır. Bu yanaşmanı müxtəlif tədqiqatlar da təsdiqləyir”. 

“Azərbaycan müəllimi” xəbər verir ki, bunu bu gün "Peşə təhsilverəni: Yeni çağırışlar və perspektivlər" mövzusunda keçirilən konfransda panel müzakirələr zamanı Elm və Təhsil Nazirliyinin Peşə təhsili siyasəti şöbəsinin əməkdaşı Rəbiyyə Museyibzadə deyib.

O bildirib ki, Avstraliyada aparılan bir tədqiqat sağlamlıq imkanları məhdud şəxslərin uğur qazanacağına inanan və inanmayan müəllimlərin şagirdlərinin nəticələri arasında ciddi fərqlər olduğunu göstərib. Belə ki, Müəllimlərin daha çox inandığı şagirdlər qiymətləndirmələrdə daha yaxşı nailiyyətlər əldə ediblər. Bunun əksinə, müəllimlərin qərəzli (stereotipli) yanaşmaları tədris prosesinə birbaşa və ya dolayı şəkildə təsir edə bilər:

“Məsələn, bəzi müəllimlər belə şagirdlərə əlavə tapşırıqlar verməkdən çəkinir və ya onların inkişaf potensialını yanlış qiymətləndirirlər. Buna görə də, müəllimlərin yanaşmaları və onların şagirdlərlə davranışları inklüziv təhsilin müvəffəqiyyətində çox böyük rol oynayır”.

O əlavə edib ki, Azərbaycanda da inklüziv təhsilin inkişafı istiqamətində müxtəlif fəaliyyətlər həyata keçirilir. Xüsusilə ümumtəhsil pilləsində potensial imkanların araşdırılması üzrə tədqiqatlar aparılır və müxtəlif layihələr reallaşdırılır.

“Həmçinin təhsilverənlərin peşəkar inkişafının dəstəklənməsi üçün müxtəlif proqramlar həyata keçirilməkdədir. Bu təşəbbüslər inklüziv təhsil mədəniyyətinin formalaşdırılmasında mühüm əhəmiyyət kəsb edir”, - deyə o əlavə edib.