Şirvan-Salyan Regional Təhsil İdarəsi üzrə Beynəlxalq SAF 2024 Festivalında iştirak edən komandalar yüksək nəticələr əldə ediblər.

İdarədən "Azərbaycan müəllimi"nə bildirilib ki, Beynəlxalq SAF 2024 Festivalında Şirvan şəhər E.B. İmanov adına 10 nömrəli tam orta məktəbin "Victors" komandası "Vidx" kateqoriyasında gümüş medal, B.Aslanov adına 16 nömrəli tam orta məktəbin şagirdlərindən ibarət komandalar isə müxtəlif kateqoriyalar üzrə mükafatlara layiq görülüblər:

“FlyTech” kateqoriyası üzrə “Skyfar” komandası, “STEAM AWARD” mükafatı - Onur Əkbərli və Qismət Səmədov,
“Vex V5” kateqoriyası üzrə “V for Vendetta” komandası, “Design Award” mükafatı - Əli Niftəliyev, 
“Engineers of Future” kateqoriyasında “Talanted Engineers” mükafatı - Yusif Hüseynli, 
“EcoCoding” kateqoriyası üzrə “Eco Boys” komandası, 3-cü yer - Abbas Süleymanlı,
“ CubeSat” kateqoriyası üzrə “Azərsky” komandası, “STEAM Award” mükafatı - Aliyə Əhmədova.

Həmçinin festivalda Şirvan-Salyan Regional Təhsil İdarəsini təmsil edən A.Dadaşov adına Hacıqabul şəhər 5 nömrəli tam orta məktəbin "Talented Engineers" komandası "Engineers of Future" kateqoriyasında gümüş medal qazanıb. Eyni zamanda, komanda “Cuboro” və eko-çanta yarışlarında da gümüş medal əldə edərək, əməkdaşlığa görə ən yaxşı nominasiyaya layiq görülüb.

Bundan əlavə, Hacıqabul şəhər İ.Ələkbərov adına 1 və Şirvan şəhər 10 nömrəli tam orta məktəblərin  şagirdlərindən ibarət  "Green life" komandası festivalda II yerə layiq görülüb.

Beynəlxalq SAF 2024 Festivalında Şirvan-Salyan Regional Təhsil İdarəsini təmsil edən S.İmanov adına Neftçala şəhər 1 nömrəli tam orta məktəbin "Victory" komandası "Engineers of Future" kateqoriyasında bürünc medal qazanıb. Həmçinin, komanda “Cuboro” və eko-çanta yarışlarında da bürünc medala layiq görülüb.

"Azərbaycan müəllimi" qalib komandaların üzvləri ilə görüşərək onların festivalla bağlı təəssüratlarını öyrənib.

“Yaşıl təbiətin cəngavərləri”

“Green Life” komandasının üzvləri Günəş Hacızadə və Zəhra Piriyeva qeyd edirlər ki, yarışa Ülkər müəllimin məsləhəti ilə qatılıblar:
"O, bizə belə bir yarışın olacağını və bizim də orada özümü orda sınamalı olduğumuzu bildirdi. Yarışın birinci mərhələsi üçün çanta hazırladıq. Seçdiyimiz mövzu "Yaşıl təbiətin cəngavərləri" idi. Biz öz çantamızı "Çiçəklənən ciyərlərimiz" adlandırmışdıq. Çantanın üzərindəki ağ ciyərləri, bütün gülləri  tullantı vasitələrini dəyərləndirərək hazırlamışdıq. Belə çanta hazırlamaqda məqsədimiz diqqətləri meşələrin qorunmasına və artırılmasına çəkməkdi. Çünki havamız təmiz,  oksigenimiz bol olarsa, ciyərlərimiz də çiçək açar. Biz "Engineers of Future" kateqoriyası üzrə 2-ci yerə layiq görüldük. Qazanacağımıza çox inanırdıq. Çünki komanda olaraq çox çalışmışdıq. Gələcəkdə növbəti STEAM festivallarına da qatılmağı düşünürük. Yenə qalib olmaq və yaşıl dünyamızı qorumaq üçün çox çalışacağıq".

"Gələcəyin mühəndisləri"

“Talented engineers” komandasının üzvləri Yusif Hüseynli və Mətləb Məmmədlinin sözlərinə görə, onların uşaqlıqdan məntiqi və yaradıcı düşünmə qabiliyyətini inkişaf etdirən oyunlara maraqları var:

"Yaşımıza və maraqlarımıza uyğun “Engineers of future” ("Gələcəyin mühəndisləri") kateqoriyası olduğunu biləndə biz də SAF 2024-də iştirak etməyə qərar verdik. Birinci tur məntiq suallarından ibarət test mərhələsi idi. Birinci turun nəticələri elan olunanda final turuna keçdiyimizi öyrəndik. Bundan sonra mentorumuz Rövşanə müəllim ilə Şirvan STEAM Mərkəzində görüşərək cuboro oyununa hazırlaşırdıq. 

“Engineers of Future” kateqoriyasında “eco çanta” layihəsi üçün nə edə bilərik? Və edəcəyimiz təqdimat barədə düşünürdük. Məqsədimiz qalib olmaq idi. Buna görə də mentorumuz ilə tez-tez görüşürdük, cuboro oynayaraq kublar üzərində ən uzun yolu tapmağa çalışırdıq. Çox çalışmağımızın və əməkdaşlığımızın nəticəsində “Engineers of future” kateqoriyası üzrə 2-ci yerə layiq görüldük. Ümid edirik ki, növbəti ildə bizim yaşımıza və maraqlarımıza uyğun kateqoriya olar və biz yenidən iştirak edərik. Bacarıqlarımızı nümayiş etdirmək üçün bizə şərait yaratdığına görə “STEAM Azərbaycan”a təşəkkür edirik".