Dağlıq Şirvan Regional Təhsil İdarəsinin əvvəlki illərdə attestat ala bilməyənlər üçün keçirdiyi son eksternat imtahanda iştirak etmək məqsədilə 285 nəfər qeydiyyatdan keçsə də, onların yalnız 243-ü imtahanlara qatılıb. 

“Azərbaycan müəllimi” illər sonra təhsilini davam etdirmək istəyənlərlə həmsöhbət olub. 

Şamaxı rayon sakini Günay Səməndərova ümumi orta təhsil səviyyəsi üzrə təhsilini başa vurub. Lakin 2008-ci ildə təhsilini yarımçıq saxlayıb. Yenidən təhsilini davam etdirmək və tam orta təhsil səviyyəsi üzrə sənəd almaq qərarına gələn Günayın sözlərinə görə, imtahanda verilən suallar bir o qədər də çətin olmayıb: 

“İmtahan prosesinin təşkilindən çox razıyam. Bir müddət idi ki, imtahana hazırlaşırdım. Məncə, oxuyan, öyrənən insan üçün suallar çətin hesab edilə bilməzdi. Təbii ki, imtahan nəticələri açıqlanana qədər həyəcanlı olacağam. Artıq anayam, iki övladım var, amma yenə də təhsilimi davam etdirmək istəyirəm. Attestat aldıqdan sonra universitetə sənəd vermək, həkim olmaq istəyirəm”.   

Digər həmsöhbətimiz Aysel Aslanova da tam orta təhsil haqqında attestat almaq niyyətindədir: “Ailəliyəm, uşaqlarıma, ev işlərinə çox vaxt ayırdığımdan imtahana bir o qədər yaxşı hazırlaşa bilmədim. Amma sualları cavablandırmaqda çətinlik çəkmədim. Təhsilini yarımçıq qoyma məcburiyyətində olanlara bildirmək istəyirəm ki, arzularınızın dalınca gedin! Əslində, biz səy göstərsək, yenidən uğur qazana bilərik”. 

İmtahanda iştirak edənlər arasında Vətən müharibəsində şəhid olmuş, ölümündən sonra "Azərbaycan bayrağı" medalı ilə təltif edilmiş Fariz Şıxaliyevın həyat yoldaşı Fərqanə Şıxaliyeva da vardı. İmtahandan əvvəl gərgin olduğunu deyən Fərqanə bizimlə söhbət edərkən artıq həyəcanının ötdüyünü söyləyib: "İmtahan sakit, tam şəffaf şəkildə keçirildi. İmtahanda iştirak edərək tam orta təhsil haqqında attestat almaq, həyat yoldaşımın peşəsini davam etdirmək, tibb sahəsi üzrə oxumaq arzusundayam”. 

Ağsu rayon sakini Nuridə Şeydayeva imtahana hazırlaşdığı üçün nəticələrinin yaxşı olacağını düşünür. Nuridə hazırda İKT sahəsində işlədiyini, gələcəkdə  təhsilini bu sahə üzrə davam etdirmək istədiyini qeyd edib.  

Alim Fətəliyev  isə 20 ildən sonra təhsilini davam etdirmək istəyir. O deyib ki, hazırda işlədiyindən imtahana hazırlaşa bilməyib. Amma ümid edir ki, imtahanın sualları çətin olmadığı üçün uğur qazanacaq. İqtisadiyyat sahəsi üzrə təhsil almaq onun gələcək hədəflərinə daxildir.   

Qobustan şəhər 1 nömrəli tam orta məktəbin məzunu, şəhid Fədail Nadirovun bacısı Selcan Əhmədova anası xəstə olduğundan Vlll sinifdən sonra təhsilini davam etdirə bilməyib. O, eksternat qaydada keçirilən imtahanda iştirak edib ümumi orta təhsil haqqında attestat almaq, tibb bacısı peşəsinə yiyələnmək niyyətindədir. O, müvafiq təhsil sənədi almaq üçün yaradılmış şəraitə görə  minnətdarlığını ifadə edib. 

İsmayıllı rayon sakini Vüqar Əliyev isə hərbçidir. O, 10 illik fasilədən sonra təhsilini davam etdirmək qərarına gəlib: “Təhsil almaq heç vaxt gec deyil. IX sinfi bitirmişəm, ümumi orta təhsil haqqında attestatım var, amma tam orta təhsil haqqında attestatım yoxdur. Buna görə də indi həmin sənədi almaq istəyirəm”.

Qeyd edək ki, aralıq imtahanının nəticələrinin növbəti həftə elan edilməsi nəzərdə tutulur.