Adı Vətəndir. Hekayəmizin qəhrəmanı olmağı üçün elə adı da bəsdir, amma bu, onu ifadə eləmək üçün çox az olar. Çünki Gənc Vətən Məmmədova nümunəvi şagird olub, parlaq abituriyent. Uğuru tələbəlikdə də davam edib. ADA Universitetində “Hüquqşünaslıq” ixtisası üzrə bakalavr təhsilini başa vurub və indi işləyir. Karyerasına şəhərimizdəki hüquq firmalarından birində kiçik hüquqşünas kimi start verib.  

“Bu məqsədə nail olmaq üçün çox çalışmışam”

Vətən 2021-ci ildə yüksək bal toplayaraq sadəcə “tələbə” adı qazanmayıb, həm də tələbəliyə Prezident təqaüdçüsü olaraq başlayıb. Bu qədər yüksək balla ADA Universitetində ödənişli təhsil almaq istəyinin səbəbinə gəlincə, bunu “Azərbaycan müəllimi”nə belə izah edib:

“Azərbaycanda təhsilinin keyfiyyəti, kurikulumunun fərqliliyi, eyni zamanda tələbələrə yaratdığı karyera və şəxsi inkişaf imkanları ilə seçilən ADA Universitetinin hüquq fakültəsində təhsil almaq məktəb illərindən məqsədim olub və ona nail olmaq üçün çox çalışmışam. Digər universitetlərin hüquq fakültələrində dövlət sifarişi ilə təhsil almaq şansım olsa da, məqsədimdən və planlarımdan vaz keçməyərək ixtisas seçimi zamanı ADA Universitetinin “Hüquqşünaslıq” ixtisasına üstünlük verdim”.

İxtisası üzrə təhsil alarkən isə akademik göstəriciləri ilə yanaşı, ictimai fəaliyyətə də önəm verib: “Tələbəlik illərim ərzində daim fəal oldum, universitetimizin Tələbə Hüquq Cəmiyyətinin üzvü kimi müxtəlif layihə və təşəbbüslərə qatıldım. Hətta hüquq sahəsində ən nüfuzlu yarışmalardan biri kimi tanınan “Vis Moot” yarışında iştirak edərək universitetimizi və ölkəmizi beynəlxalq səviyyədə təmsil etmək şansı əldə etdim”.

“Ödənişli əsaslarla təhsil almaq öz seçimim olub”

Təbii ki, bəzi məqsəd və hədəflər, sadəcə onlara çatana qədər yox, elə çatandan sonra da fədakarlıqlar tələb edir. Vətən üçün ADA Universitetinin təhsil haqqı kifayət qədər yüksək idi. Bəs o nəyə güvənərək ADA Universitetini seçmişdi? Təbii ki, özünə: “Ödənişli əsaslarla təhsil almaq öz seçimim olub və bu səbəbdən təhsil haqqını da özüm ödəmək istəyirdim. Məncə, bu, cəmiyyətdə təəccüb doğurmamalıdır. Tələbələrin hər hansı gəlir mənbəyi olmadığı üçün təhsil haqlarını özlərinin qarşılaması qeyri-mümkün olsa da, bu məsuliyyəti öz üzərlərinə götürmək istəmələri tamamilə təbiidir. Ailəmə əlavə yük yaratmaq istəmirdim”.

Ona görə də təhsil tələbə krediti lap yerinə düşüb: “Yüksək nəticə göstərərək ADA Universitetinə qəbul olunduğum üçün təhsil haqqında güzəşt əldə etdim. Ancaq bu güzəşt, sadəcə ilk tədris ilinə aid edildi. Belə bir vaxtda Təhsil Tələbə Krediti Fondunun yaratdığı imkan mənə dəstək oldu. Hüquqşünas kimi karyerama başladıqdan sonra təhsil haqqını öz ayaqlarım üzərində dayanaraq ödəyə bilmək fonda müraciətimin əsas səbəblərindən biri oldu”.

Vətən yağışdan çıxıb yağmura düşməsin deyə əvvəlcə yaxşı-yaxşı araşdırıb: “Fond haqqında ətraflı məlumat əldə etdikdən sonra bu imkanın tələbələr üçün nə qədər əhəmiyyətli və onların maneəsiz şəkildə təhsil ala bilmələrinə vasitə olduğunu düşündüm. Bu təşəbbüs mənə çox maraqlı gəldi və üçüncü kursdan etibarən təhsil xərclərimin qarşılanması məqsədilə mən də təhsil krediti üçün müraciət etdim”.

Təhsil krediti arzuladığı universitetdə və ixtisasda təhsil almağına yol açdı

Düşünürəm ki, fondun yaratdığı imkanın mənim təhsil və karyera həyatımda faydası böyükdür. Çünki nəticə etibarilə, bu, mənim arzuladığım universitetdə və ixtisasda təhsil almağıma yol açaraq gələcək məqsədlərimə doğru daha inamla irəliləməyimə və təhsil xərclərimi öz imkanlarımla qarşılamağıma şərait yaradıb.