Təhsil Tələbə Krediti Fondu aprelin 3-4-də Azərbaycan Texniki Universitetinin tələbələri üçün təlimlər keçirəcək. Təlimlərə 25 tələbənin qatılması nəzərdə tutulur.

Bu barədə “Azərbaycan müəllimi”nə fondun İctimaiyyətlə əlaqələr üzrə mütəxəssisi Gülnar Zeynalova məlumat verib. 

Onun sözlərinə görə, təlim Təhsil Tələbə Kredit Fondunun həyata keçirdiyi “Yumşaq bacarıqlarla əmək bazarına addımla" adlı layihəsi çərçivəsində reallaşacaq: 

“Layihəyə fevral ayında start verilib. Əsas məqsədimiz tələbələri əmək bazarının tələblərinə uyğun şəkildə hazırlamaq, onların yalnız nəzəri biliklərə deyil, həm də praktik bacarıqlara - liderlik, komanda işi, ünsiyyət, vaxtın idarə olunması və problem həlletmə kimi yumşaq bacarıqlara yiyələnməsinə şərait yaratmaqdır. Təlimlər aprel ayının sonuna qədər keçiriləcək”.

Mütəxəssis məlumat verib ki, layihə başlanandan indiyə qədər dörd ali, 1 orta ixtisas təhsili müəssisəsində təlimlər keçirilib: “Bakı Avrasiya Universiteti, Bakı Slavyan Universiteti, Bakı Biznes Universiteti, Azərbaycan Dövlət Mədəniyyət və İncəsənət Universiteti və Bakı Biznes və Kooperasiya Kollecində təlimlərimiz olub. İndiyədək hər biri 2 saat olmaqla cəmi 10 təlim keçirmişik”.

G.Zeynalova əlavə edib ki, layihənin məqsədi tələbələrin gələcək karyeralarını daha uğurlu qurmasına, onların əmək bazarında özlərinə layiqli yer tapmasına kömək etməkdir. Layihə çərçivəsində ali və orta ixtisas təhsili müəssisələrində təhsil alan, eyni zamanda təhsil tələbə kreditlərindən faydalanan bütün tələbələr üçün “Liderlik və komanda işi”, “Məqsədlərin müəyyən edilməsi və vaxt idarəçiliyi” mövzularında təlimlər təşkil edilir.

Layihənin əsas məqsədi tələbələrin yumşaq bacarıqlara yiyələnməsinə, təhsil tələbə krediti almış tələbələrin əmək bazarına daha yaxşı inteqrasiya olunmasına dəstək verməkdir.