“İnklüzivlik dünyəvi bir anlayışdır, cəmiyyətin bütün təbəqələrini əhatə edir”.

“Azərbaycan müəllimi” xəbər verir ki, bunu bu gün Bakı Slavyan Universitetində keçirilən “İnklüzüv təhsildən inklüzüv cəmiyyətə: bərabər imkanlar və dayanıqlı inkişaf” adlı III Beynəlxalq konfransda iştirak edən Milli Məclisin deputatı Nigar Məmmədova jurnalistlərə açıqlamasında bildirib.

O bildirib ki, inklüzivlik tam bərabər hüquqları təmin etməkdən daha geniş konsepsiyadır:

“Biz inklüziv cəmiyyət dedikdə, əlbəttə ki, həssas əhali qruplarını nəzərdə tuturuq. Həssas əhali qrupları müdafiəyə, diqqət və qayğıya ehtiyacı olan qruplardır. Dövlətin resursları həmrəy şəklində – vətəndaş cəmiyyəti, dövlət sektoru, özəl sektorla birlikdə, həssas əhali qruplarının problemlərini daha asan şəkildə həll etməyə yönəldilir. İnklüziv cəmiyyətin yaradılmasından, inkişafından danışanda, əlbəttə ki, biz inklüziv təhsildən danışmalıyıq. İnklüziv təhsil bütün təbəqələrin eyni hüquqlara, eyni dərəcədə təhsilə çıxışını təmin edir. Bundan başqa, biz söyləməliyik ki, məhz inklüziv təhsilin məqsədlərindən biri həssas əhali qrupundan olan uşaqların dünyagörüşlərini inkişaf etdirmək, onlara hərtərəfli dəstəkdir”. 

Millət vəkili onu da qeyd edib ki, inklüzivlik həmçinin bizim həssas qrupdan olan övladlarımızın zamanın tələblərinə uyğun olaraq onların inkişaf etdirilməsini təmin edir, onları məhz cəmiyyətdə gedən proseslərə cəlb edir:

"Bu, çox vacibdir. Çünki istər həssas əhali qrupuna aid olan, istərsə də digər uşaqların həyat strategiyasını formalaşdırmaq, onları erkən yaşlardan cəmiyyətə inteqrasiya etmək üçün inklüziv təhsil çox vacibdir. Həmçinin qeyd etməliyik ki, ölkəmizdə dayanıqlı, inklüziv və sosial ədalətə əsaslanan cəmiyyət quruculuğu “Azərbaycan 2030: sosial iqtisadi inkişafa dair Milli Prioritetlər”imizdən biridir və bu yolda da bizi böyük uğurlar gözləyir”.