Martın 2-də işğaldan azad olunmuş Ağdərə, Şuşa, Laçın, Xankəndi və Xocalı rayonlarında Dövlət İmtahan Mərkəzi (DİM) tərəfindən tam (11 illik) orta təhsil səviyyəsi üzrə buraxılış imtahanı keçirilib. Xankəndi, Şuşa və Xocalı rayonlarında, həmçinin Laçın rayonunun Sus kəndində ilk dəfə olaraq buraxılış imtahanları təşkil edilib. 

"Azərbaycan müəllimi" DİM-ə istinadən xəbər verir ki, imtahanda Xankəndi şəhəri 4 nömrəli  tam orta məktəbin 14, Xocalı şəhəri 1 nömrəli tam orta məktəbin 4, Şuşa şəhəri 1 nömrəli tam orta məktəbin  8, Laçın rayonu Sus kənd tam orta məktəbinin isə 3 şagirdi buraxılış imtahanında iştirak edib.

Əlavə olaraq Laçın rayonu 2 nömrəli tam orta məktəbində 9 , Laçın rayonu Zabux kənd tam orta məktəbində 3, Ağdərə rayonu Talış kənd tam orta məktəbində 4 şagird üçün buraxılış imtahanları keçirilib. Bu məktəblərdə buraxılış imtahanları ikinci dəfə təşkil edilir.

İşğaldan azad olunan rayonlar üzrə buraxılış imtahanları  7 binada təşkil olunub. İmtahanın idarə olunmasına 7 bina nümayəndəsi və 7 imtahan rəhbəri  cəlb olunub.
İşğaldan azad olunmuş rayonlardakı imtahanlarda ümumilikdə 45 şagirdin iştirakı nəzərdə tutulmuşdu.

Qeyd edək ki, işğaldan azad olunan Zəngilan rayon Ağalı kənd tam orta məktəbində, Füzuli şəhər M.Uluqbəy adında 1 nömrəli tam orta məktəbində və (Cəbrayıl şəhər M. Mehdizadə adına şəhər tam orta məktəbində ilk dəfə) 09.03.2025-ci il tarixində buraxılış imtahanları keçiriləcək.

İmtahan binalarına Dövlət İmtahan Mərkəzinin əməkdaşları tərəfindən əvvəlcədən baxış keçirilmiş və lazımı hazırlıqlar görülüb. İmtahandan 1 gün əvvəl imtahan binalarına DİM əməkdaşları tərəfindən  yenidən baxış keçiriləcək.