"Ümumi təhsildə bizim əhatəlilik problemimiz yoxdur. Burada ən böyük problemimiz xüsusi təhsillə bağlıdır".

"Azərbaycan müəllimi" xəbər verir ki, bunu elm və təhsil naziri Emin Əmrullayev VIII ADA Beynəlxalq Təhsil Konfransında çıxış edərkən deyib.

O bildirib ki, çünki yanaşma çox köhnədir. Onu müasir yanaşma ilə əvəz etmək üçün isə külli miqdarda vəsait lazımdır.

"İndi yanaşma belədir. Uşaqlar tibbi-pedaqoji komissiyadan keçirlər. Əgər tipik uşaqdırsa, ümumi təhsil müəssisəsinə gedir, tipik uşaq deyilsə, proqrama uyğun məktəbə yönləndirilir. Onlar üçün xüsusi proqramlar var.

Əslində inklüzivlik tədrisə cəlb edilmə ilə bağlı problemi müəyyən qədər həll etsə də, lakin onlar üçün internatlar var.

Həmin uşaqların ümumi təhsil müəssisəsində oxuması əslində qanunla qadağandır. Çünki məktəblərdə xüsusi proqramlar yoxdur. Sadəcə bəzilərində var. Ya da bəzən kənd yerlərində uşağın heç bir xüsusi proqram olmadan kənd məktəbinə gedib gəlməsi təmin edilir. Bu, öz-özlüyündə getməməyindən, təbii ki, daha yaxşıdır, amma biz buna inklüziv təhsil deyə bilmərik".

Nazir qeyd edib ki, bu problemdən xəbərimiz var. Lakin bunun üçün kadr hazırlığı, bu məsələni başa düşən mütəxəssislərin olması, fərdi təhsil proqramlarımızın olması vacibdir:

"Bizim evdə fərdi təhsillə məşğul olan məktəblərimiz var idi. İndi onları yavaş-yavaş bağlayırıq. Çünki ən çox korrupsiyaya uğramış məktəblər onlar idi. Çox sui-istifadə halları müşahidə olunurdu. 20 uşaq varsa, 20 sinif deməkdir və dərs saatlarının sayı 20 dəfə çoxdur. Dərs bölgüsündə sadəcə olaraq oğurluqla məşğul olurdular.

Bunun qarşısını almaq üçün daha çox inklüziv siniflərə keçid etmək istəyirik.

Yeni yanaşmamız ondan ibarətdir ki, uşaq hansısa məktəbin ərazisində yaşayırsa, həmin məktəbin müəllimi evdə təhsil üçün gedə bilər. Onu ayırmağa ehtiyac yoxdur, çünki sonradan məktəbə qayıda bilər".