İnsanlar tez-tez fəaliyyətə yeni başlayan müəllimlərin təcrübəsiz olduqları üçün çətinliklərlə qarşılaşdıqlarını söyləyirlər. Fəaliyyətə yeni başlayan müəllimlər həm şagirdlərə, həm də həmkarlarına yeni düşüncə tərzi, texnoloji bacarıqlar və güclü əlaqələr qurma qabiliyyəti kimi bir çox faydalar verə bilərlər. Yeni müəllimlər bəzən daha çox təcrübə tələb edən tədris sahələrində müxtəlif çətinliklərlə qarşılaşırlar.

“Azərbaycan müəllimi” “Education World”ə istinadla yeni fəaliyyətə başlayan müəllimlər üçün bir neçə məsləhəti təqdim edir:

1. Müxtəlif planlaşdırma taktikaları

Şagirdlərin sinif otağına daxil olduğu anda verdiyi ilk suallardan biri  "bu gün nə edəcəyik?" olur. Xüsusilə tədris prosesinin ilk illərində yeni fəaliyyətə başlayan müəllimlərin özləri də bu sualı düşünürlər.

Planlaşdırmanı asanlaşdırmaq üçün aşağıdakıları etmək faydalıdır:

– Slaydlar və ya tapşırıq şablonları kimi sənədləri və ya sinif resurslarını daha təcrübəli və materiallarını bölüşməyə daha həvəsli olan həmkarlarınızdan ala bilərsiniz.

– Həmkarlarınızın materialları hər zaman faydalı olmayacaq, lakin bu, planlaşdırma işinə kömək edəcək. Bir çox açıq mənbəli kurikulum materialları mövcuddur. Bunlardan istifadə edə bilərsiniz.

2. Siniflə bağlı məsləhətlər

Tədris prosesi çox vaxt və enerji tələb edir, lakin yeni müəllimlər üçün ən qorxulu anlar adətən ilk və son zəng arasındakı dəqiqələrdə baş verir. İlk bir neçə ildə mükəmməllik hər kəsin əsas məqsədi olmur, lakin bir neçə əsas qayda bu prosesi asanlaşdıra bilər:

– Şagirdlərlə qarşılıqlı mübahisələrə qoşulmayın. Yeni fəaliyyətə başlayan müəllimlər bəzən qarşılıqlı hörmət və əməkdaşlıqla zəngin sinif yaratmaqda çətinlik çəkirlər.

– Aydın gözləntilər müəyyənləşdirin. Bu zaman çevik və fikirlərə açıq olun. Tələbələr güclü struktur və iş rejimi olan siniflərə ehtiyac duyurlar. Müəllimlər qarşılaşdıqları hər hansı problemi həll etməli və lazım gəldikdə düzəlişlər etməyə açıq olmalıdırlar.

– Şagirdlərlə əlaqə qurmağa önəm verin. Pedaqoq Rita Pierson qeyd edir ki, uşaqlar sevmədikləri müəllimlərdən öyrənmirlər. Ümumiyyətlə, şagirdlər psixoloji cəhətdən təhlükəsiz olan siniflərdə daha çox öyrənirlər.

3. Qiymətləndirmə məsləhətləri

Şagirdlərin irəliləyişini qiymətləndirmək sadə proses deyil. Müəllimlər təcrübə səviyyəsindən asılı olaraq qiymətləndirmə zamanı müxtəlif problemlərlə qarşılaşa bilirlər. Xüsusilə yeni müəllimlər bu məsələdə daha çox çətinlik çəkirlər. Ümumiyyətlə, yeni müəllimlər bəzən düzgün qiymətləndirmə aparmaq üçün daha çox tapşırıqlar verirlər, bu da daha çox problemə səbəb olur. İş yükünü azaldaraq qiymətləndirmə ilə bağlı aşağıdakı yanaşmalar tövsiyə edilə bilər:

– Nəyi qiymətləndirmək lazım olduğunu bilin. Şagirdlər bir çox sahədə güclü ola bilərlər, amma siz hər şeyi eyni anda düzəldə bilməzsiniz. Hər bir tapşırıq üçün yalnız bir və ya iki prioritet seçmək rəy vermə prosesini asanlaşdırır.

– Hər şeyi qiymətləndirməyin. İşin təqdim edilməsi onun qiymətləndirilməsi demək deyil. Bəzi tapşırıqlar şagirdin anlayışını öyrənmək üçün istifadə edilir.

– Əlaqənin rolunu artırın. Qiymətin özündən daha vacib olan şagirdlərə öyrənmə hədəflərinə çatmaqla bağlı verdiyiniz rəylərdir. Bu rəylər şagirdlərin inkişafını izah etməyə və onlara növbəti addımlar üçün istiqamət verməyə kömək edir.

Nəhayət, yeni və ya təcrübəli hər bir müəllim üçün daha yaxşı yanaşma formativ və summativ qiymətləndirməni fərqləndirməkdir. Bu halda şagirdlərin biliklərinin qiymətləndirilməsində balans qorunar.