ABŞ-də məktəblərdə mobil telefon qadağasına dəstək artır
ABŞ-də vətəndaşların 77 faizi orta və yuxarı sinif şagirdlərinin dərs zamanı mobil telefondan istifadəsinin qadağan edilməsini dəstəkləyir.
"Azərbaycan müəllimi" xəbər verir ki, "Pew" Araşdırma Mərkəzinin 2026-cı il mayın 26-dan iyunun 1-dək keçirdiyi sorğunun nəticələrinə görə, amerikalıların 48 faizi şagirdlərin bütün tədris günü ərzində mobil telefondan istifadəsinə qadağa qoyulmasını dəstəkləyir. Bu, belə qadağaya dəstəyin ilk dəfə əleyhdarların sayını üstələməsi deməkdir.
Dərs zamanı mobil telefon qadağasına dəstək son iki ildə ardıcıl olaraq artıb. Hazırda ABŞ-də böyüklərin 77 faizi bu siyasətin tərəfdarı, 18 faizi isə əleyhinədir. 6 faiz respondent isə mövqeyini müəyyənləşdirməyib.
Bütün tədris gününü əhatə edən qadağaya dəstək isə 2024-cü ildəki 36 faizdən 2026-cı ildə 48 faizə yüksəlib. Respondentlərin 43 faizi belə qadağaya qarşı çıxıb, 8 faizi isə qərarsız qalıb.
"Pew" Araşdırma Mərkəzinin məlumatına görə, bu dəstəyin artması ABŞ-nin daha çox ştatında məktəblərdə bütün gün üçün mobil telefon qadağalarının tətbiq olunması ilə eyni vaxta təsadüf edir. Mərkəzin 2025-ci ildə keçirdiyi sorğuda respondentlərin əksəriyyəti belə qadağaların şagirdlərin qiymətlərinə, sosial bacarıqlarına və sinifdə davranışına müsbət təsir göstərə biləcəyini bildirib.
Yaş qrupları arasında fərqlər də var. 30 yaşdan aşağı respondentlərin 57 faizi dərs zamanı mobil telefon qadağasını dəstəkləyir. Bu göstərici 2024-cü ildə 45 faiz olub. Bütün gün davam edən qadağaya isə həmin yaş qrupunda yalnız 28 faiz dəstək verir. 30 yaşdan yuxarı amerikalıların ən azı yarısı isə belə qadağanın tərəfdarıdır.
