AzMİU ilə AYNA arasında əməkdaşlıq əlaqələri inkişafı genişləndirilir
Azərbaycan Memarlıq və İnşaat Universiteti (AzMİU) və Azərbaycan Yerüstü Nəqliyyat Agentliyi (AYNA) arasında əlaqələrin inkişafına yönəlmiş mühüm görüş keçirilib.
Universitetdən “Azərbaycan müəllimi”nə bildirilib ki, görüşdə hər iki tərəf arasında əməkdaşlıq çərçivəsinin genişləndirilməsi və müasir təhsil tələblərinə uyğun yeni təşəbbüslərin irəli sürülməsi məsələləri müzakirə edilib.
Görüşdə AYNA-nı İnsan Resursları Departamentinin rəisi Lalə Məmmədova və aparıcı mütəxəssis Xatirə Namazova təmsil edib. AzMİU tərəfindən Nəqliyyat fakültəsinin dekanı Elçin Yusifzadə, Nəqliyyat və Logistika kafedrasının müdiri professor Qasım Abdullayev, Təcrübə və Karyera Mərkəzinin direktoru Xanlar Qənizadə və Strateji Planlaşdırma Şöbəsinin müdiri Qənirə Məmmədzadə iştirak edib. Görüşün əsas məqsədi mövcud əməkdaşlıq müqaviləsinin yenilənməsi və AzMİU tələbələrinin akademik və peşəkar inkişafı üçün daha əlverişli imkanların yaradılması olub.
Görüş zamanı AYNA-nın ekspertizası və tələbləri nəzərə alınmaqla, Nəqliyyat və Logistika ixtisasları üzrə mövcud bakalavr proqramlarının yenilənməsi məsələsi müzakirə olunub. AYNA nümayəndələri tədris proqramlarının müasir əmək bazarının tələblərinə uyğunlaşdırılması üçün təkliflərin hazırlanmasında dəstək göstərməyə hazır olduqlarını bildiriblər. Bu istiqamətdə əməkdaşlıq prosesinin tezliklə başlanması qərara alınıb.
AzMİU tələbələrinin karyera inkişafı müzakirələrin əsas mövzularından biri olub. AYNA tərəfindən ixtisas üzrə təhsil alan tələbələrin işə qəbul proseslərinin asanlaşdırılması və onlara xüsusi təqaüdlərin ayrılması ilə bağlı fikir mübadiləsi aparılıb. Eyni zamanda, tələbələrin potensial iş yerlərində praktiki təcrübə keçmələri üçün əməkdaşlığın daha geniş çərçivədə həyata keçirilməsi planlaşdırılır.
AzMİU və AYNA arasında bu cür əməkdaşlıq təhsil və iş dünyası arasında möhkəm əlaqələrin qurulması baxımından mühüm əhəmiyyət kəsb edir. AYNA-nın dəstəyi ilə AzMİU-da təhsil alan tələbələr, gələcəkdə nəqliyyat və logistika sektorunda innovativ həllər təqdim edə bilən rəqabətqabiliyyətli kadrlar kimi formalaşacaq.
AzMİU və AYNA bu görüşün yalnız başlanğıc olduğunu və gələcəkdə birgə həyata keçiriləcək layihələrin daha geniş miqyas alacağını vurğulayıb. Görüş zamanı təhsil və iş dünyası arasında əməkdaşlığın davamlı inkişafı üçün konkret strategiyalar müzakirə olunub. Bu istiqamətdə əməkdaşlıq yalnız tələbələrin inkişafına deyil, həm də Azərbaycanın nəqliyyat sektorunun ümumi inkişafına mühüm töhfə verəcək.
