İnşaat ustalarına peşə ixtisasını təsdiqləyən sənədlər təqdim edilib
Təhsildə Keyfiyyət Təminatı Agentliyi (TKTA) və “Norm” ASC-nin birgə tərəfdaşlığı çərçivəsində TKTA tərəfindən həyata keçirilən inşaat ustası peşə ixtisasının qiymətləndirilməsi imtahanında uğurlu nəticə göstərən Norm Ustalar Klubunun üzvləri üçün təltifetmə tədbiri təşkil edilib.
Agentlikdən “Azərbaycan müəllimi”nə bildirilib ki, “Norm” ASC-nin icraçı direktoru Henninq Sasse “Norm” Ustalar Klubunun üzvlərinin peşəkar inkişafının şirkətin prioriteti olduğunu və bu cür layihələrin “Norm”un sosial məsuliyyət strategiyasının mühüm hissəsini təşkil etdiyini qeyd edib.
Daha sonra TKTA İdarə Heyətinin sədri Tural Əhmədov ölkəmizdə qeyri-formal və informal təhsilin tanınmasının əmək bazarında ixtisaslı kadrların sayına müsbət təsirindən bəhs edib. O, layihənin inşaat sahəsində çalışan ustaların bilik və bacarıqlarının tanınması baxımından mühüm əhəmiyyətini vurğulayaraq gələcəkdə əməkdaşlığın daha geniş miqyasda davam etdirilməsinin zəruri olduğunu diqqətə çatdırıb.
Qeyd edək ki, TKTA ilə “Norm” ASC arasında qeyri-formal və informal təhsilin tanınması istiqamətində əməkdaşlıq çərçivəsində Norm Ustalar Klubunun 30 üzvünün inşaat ustası istiqaməti üzrə peşə ixtisasının tanınması ilə bağlı anlaşma memorandumu imzalanıb və yekunda layihə üzrə 21 nəfər müraciətçi peşə ixtisasını təsdiq edən sənəd əldə edib.
Sözügedən layihənin icra olunmasında məqsəd inşaat ustalarının peşəkar inkişafına töhfə vermək, onların dayanıqlı məşğulluq imkanlarının artırılmasına şərait yaratmaq və sosial rifahının yüksəldilməsinə dəstək olmaqdır.
