COP29 çərçivəsində Azərbaycanın təqdim etdiyi ekoloji təhsil layihələri və beynəlxalq əməkdaşlıq təşəbbüsləri qlobal miqyasda diqqət mərkəzindədir. Təhsil sahəsində innovativ yanaşmaların tətbiqi və ətraf mühitin qorunması istiqamətindəki səylər ölkənin bu sahədəki nüfuzunu artırır. Ekoloji təhsil sahəsində beynəlxalq təşkilatlarla əməkdaşlıq edən Azərbaycan qlobal davamlılıq hədəflərinə töhfə vermək üçün də mühüm platforma yaradır.

COB29-da Azərbaycanın təşəbbüslərini beynəlxalq aləmə təqdim edən təşkilatlardan biri də “Ekosfera” Sosial-Ekoloji Mərkəzidir.

Mərkəzin rəhbəri, COP29-un Təşkilat Komitəsinin üzvü Firuzə Sultan-zadə “Azərbaycan müəllimi”nə açıqlamasında deyib ki, COP29-da təhsildə qeyri-formal fəaliyyətləri aparan ekoloji təşkilatlarla birlikdə iştirak edirlər. Həmçinin COP29-da layihələri, fəaliyyətləri haqqında məlumat verir, beynəlxalq tərəfdaşlar axtarırlar.

Azərbaycanın bu tədbir çərçivəsində qabaqcıl pilot layihələrini təqdim etdiyini deyən F.Sultan-zadə COP29-da “Yaşıl məktəblər”, “Ekoloji liderlər”, “Orqanik məktəb bağları” layihələrinin, eyni zamanda, qeyri-formal kurikulum üzrə fəaliyyət göstərən eko-klublar, dərnəklərlə bağlı nümayişlərin həyata keçirildiyini açıqlayıb:

“Biz bu ildən beynəlxalq Ətraf Mühit üzrə Təhsil Fonduna üzv seçilmişik. Bu da göstərir ki, “Yaşıl məktəb” proqramımız bu sahədə səmərəli fəaliyyət göstərən beynəlxalq təşkilatlarla əməkdaşlıq edə bilər”. 

Firuzə Sultan-zadə əlavə edib ki, doqquz il ərzində qeyri-hökmət təşkilatları, Uşaq-Gənclər İnkişaf mərkəzləri ilə birlikdə məktəbdənkənar müəssisələrdə çox sayda ekoloji layihələr keçirilib. Şagirdlər ətraf mühitin qorunması, ekoloji həssaslığın artırılması istiqamətində fəaliyyətlərə cəlb ediliblər. "Yaşıl məktəb” proqramı Bakıda 40, regionlarda isə 58 məktəb və mərkəzi əhatə edir.

COP29-un iştirakçılarından olan Ətraf Mühit üzrə Təhsil Fondunun Təhsil üzrə baş direktoru Pramod Kumar Şarma Azərbaycanda olmasından məmnunluq duyduğunu deyib. 

Onun sözlərinə görə, 1981-ci ildə yaradılan fond dünyanın ən böyük ekoloji təhsil təşkilatlarından biridir:

“Artıq bizim tərəfdaşlıq etdiyimiz ölkələrin sırasında Azərbaycan da var. “Ekosfera” Sosial-Ekoloji Mərkəzi bizim üzv təşkilatların sırasındadır. Təhsil proqramlarımız, eko-məktəblər, ekosistemlər və meşələr haqqında öyrənmə gənclərə həllə əsaslanan yanaşma vasitəsilə ekoloji cəhətdən şüurlu dünya yaratmağa imkan verir".