Bu gün COP29 çərçivəsində SOCAR və SABAH.HUB-un birgə tərəfdaşlığı ilə "Dayanıqlı innovasiyalar çağırışı" mövzusunda tədbir keçirilib.

“Azərbaycan müəllimi” xəbər verir ki, tədbirdə açılış nitqləri ilə çıxış edən SOCAR-ın prezidenti Rövşən Nəcəf və SABAH.HUB-ın icraçı direktoru Rəhim Bayramlı qlobal əməkdaşlığın, iqlim texnologiyalarından istifadənin ətraf mühitin qorunması prosesindəki əhəmiyyətini vurğulayıblar.

Tədbirdə yerli və xarici startaplar olmaqla, umumilikde 10 layihə və iqlim texnologiyaları sahəsində innovativ həllər təqdim edilib.  

Tədbirdə hər komanda davamlı gələcək üçün öz unikal yanaşmasını nümayiş etdirib. Tədbirdə keçirilən qiymətləndirmə nəticəsində ən yaxşı 3 startap seçilib. 

“Azərbaycan müəllimi”nə açıqlama verən SABAH.HUB şirkətinin İcraçı direktoru Rəhim Bayramlı bildirib ki, builki COP29-da iqlim hədəflərinə nail olmaq üçün maliyyələşmənin aparılması ilə bağlı mühüm mövzular müzakirə edilir. Bu hədəflərə çatmaq üçün kreativ və yaradıcı gənclərin iqlim mövzuları üzrə təşəbbüslərinin dəstəklənməsi olduqca vacibdir.

O əlavə edib ki, SOCAR COP29 çərçivəsində SABAH HUB vasitəsilə “cleantech” sahəsində fəaliyyət göstərən şirkətlərə bir milyon dollar vəsait ayırıb:

“COP29-da SABAH HUB olaraq, 38 komanda ilə təmsil olunuruq. Onlardan on beşi bizim proqramların məzunlarıdır. Bu gün beş qitənin 15 ölkəsindən 25-ə yaxın startapçı COP29-da iştirak edir".

Qeyd edək ki, SABAH.HUB müxtəlif sahələrdə yeni startapların yaranmasına və inkişaf etməsinə dəstək olan innovasiya mərkəzidir.