8 yaşlı Dərya Hüseyinova bu il noyabrın 9-10-da Albaniyanın paytaxtı Tirana şəhərində keçirilmiş Avropa çempionatının qalibi kimi adını idman tarixinə yazdırıb. Onun gözəl, səmimi və zərif görünüşünün arxasında böyük güc dayanr. O, bu qüvvəni, döyüşkənlik ruhunu atasından alıb. Dərya 2020-ci ildə Vətən müharibəsi dövründə Cəbrayıl uğrunda gedən döyüşlərdə qəhrəmancasına şəhid olan, “Cəbrayılın azadlığı uğrunda”, “Vətən uğrunda”, “Döyüşdə fərqləndiyinə görə” medalları ilə təltif olunan Elbrus Hüseyinovun yadigarıdır. 

Kiçik Dəryanın böyük həyat hekayəsi... 

Əslən Kəlbəcər rayon sakini olan, müvəqqəti olaraq Göygöl şəhərində məskunlaşan ailənin iki qız övladı var: Dərya və Aydan. Ataları qızlarını idmançı kimi görmək istəyirdi. Onun böyük xəyalını gerçəkləşdirən bacılar Göygöl şəhər İrəvan İdman Mərkəzində taekvando idman növü ilə məşğul olurlar. Evin böyük qızı Aydan 2 dəfə ölkə üzrə keçirilmiş yarışda 1-ci yerə layiq görülüb. İdmanla müntəzəm məşğul olan Aydan gələcəkdə bacısı kimi beynəlxalq yarışlarda qələbə qazanacağına əmindir. Elə Dəryanın “çempion” titulu qazanması da məşqçisi Elvarə Cəlilova ilə birlikdə gecə-gündüz yorulmadan çalışmasının nəticəsidir. 

Artıq 3 ildir taekvando ilə məşğul olan 8 yaşlı Dərya döyüş ruhlu olmasını belə izah edir: 

– Atam hərbçi idi. Hər gün işdən evə gələndə bizimlə məşğul olmağı çox sevirdi. Döşəmənin üzərində sanki yarışda mübarizə aparırmış kimi güləşərdik. Hər gün işdən nə qədər yorğun gəlirsə gəlsin, bizi idmana həvəsləndirmək üçün oyun şəklində yarışlar edərdi.

Oyundan real çempionata gedən mübarizə yolu...

Atası müharibədə olanda Dəryanın 4 yaşı var idi. 44 günlük müharibə dövründə hər gün atasından aldığı xəbərlərlə, onun döyüş hekayələri ilə özündə güc toplayırdı. Elə indi də yarışlarda ona ən çox güc və dözümlülük verən atasının qəhrəmanlığıdır: 

– Hər döyüş, hər rəqib mənim üçün final qədər vacibdir, çünki məqsədim çox böyükdür və ona çata bilmək naminə böyük çətinliklərdən keçirik. Hər yarışa hazırlaşanda atamın qızı olduğumu unutmuram, onun adına layiq olmaq üçün əlimdən gələni edirəm və edəcəyəm də!

Şəhidin çempion qızı rəqibləri ilə mübarizədə taekvandonun əsas prinsiplərini də unutmur: nəzakət, düzgünlük, təmkin və sərbəst ruh. Onunla söhbət edərkən nurlu üzündəki təbəssümünün arxasındakı sadaladığımız keyfiyyətləri görmək olur. 

Onun qələbəsinə hamı sevinir...

Dərya həyatının ən böyük həyəcanını Albaniyanın paytaxtı Tirana şəhərində yaşadı. Böyük məsuliyyəti balaca çiyinlərində daşıyan idmançı 24 kq çəki dərəcəsində rəqiblərini üstələyərək Azərbaycanın üçrəngli bayrağını zirvəyə qaldırdı. Himnimizin sədaları altında fəxrlə atasının ruhunu şad etdi. Dərya vətənə qayıdanda ilk olaraq Göygöl şəhərinin Şəhidlər Xiyabanında dəfn olunan atası – şəhid Elbrus Hüseyinovun məzarını ziyarət edərək onunla sevincini bölüşüb. Qələbə qazanması münasibətilə Gəncə-Daşkəsən Regional Təhsil İdarəsinin müdiri Elçin Kərimov da Dərya ilə görüşüb. Məktəblini təşəkkürnamə və hədiyyə ilə təbrik edən idarə rəhbəri şagirdlərin hər zaman dövlət tərəfindən diqqət mərkəzində olduğunu bildirib. Azərbaycan Təhsil İşçiləri Azad Həmkarlar İttifaqının əməkdaşları, yetirməsi olduğu İrəvan İdman Mərkəzinin kollektivi Dəryanın sevincinə şərik olaraq ona hədiyyələr təqdim ediblər. Ağdaban İctimai Birliyi Tərtər rayonunda şəhidimizin qəhrəman övladının şərəfinə tədbir təşkil edilərək noyabrın 22-də onun ad gününü təbrik edib, Məktəbdə isə qalibi həm doğum günü, həm də “çempion” titulunu qazandığına görə böyük sürprizlə qarşıladılar. 

O, həm də məktəbin fəal şagirdidir.... 

Dərya Avropa çempionatındakı görüşündən danışarkən ona hazırlıq mərhələsini xatırlayır. Göygöl şəhər 6 nömrəli tam orta məktəbin 3-cü sinfində oxuyan məktəblinin dərslərlə arası yaxşı olsa da, həmin müddətdə çətinliklərlə üzləşirdi:

– Çempionata hazırlaşanda bəzən məşqlərə görə dərslərdən tez çıxmalı olurdum. Pərvanə müəllim (Pərvanə Süleymanova- ibtidai sinif müəllimi) mənə çox dəstək olurdu. Boş vaxtlarımda dərslərimlə əlavə məşğul olurdu ki, uşaqlardan geri qalmayım. Hətta elə olurdu ki, o, təki dərslərimi öyrənib çatdırım deyə istirahət vaxtlarını da mənə ayırırdı. 

Dərya məktəbdə fəal şagirdlərdəndir, bir neçə sertifikatla təltif olunub. Ən sevdiyi fənn isə ingilis dilidir. Gələcəkdə özünü idman sahəsində görən Dəryanın bundan sonrakı məqsədi dünya, daha sonra isə Olimpiya çempionu olmaqdır. 

“Azərbaycan müəllimi” adından yeni yaşına qədəm qoyan çempionumuza qət edəcəyi şərəfli yolda böyük uğurlar arzulayırıq! Ruhun şad olsun Elbrus Hüseyinov, övladların atalarının ən böyük arzusunu yerinə yetirmək uğrunda əzmlə irəliləyirlər!