Türkiyədə yaşı 13-dən kiçik olan uşaqların sosial media proqramlarına və sosial şəbəkələrə daxil olmasının qadağan edilməsi üçün işlərə başlanılıb.

“Azərbaycan müəllimi” Türkiyənin “Sabah” qəzetinə istinadən bildirir ki, Ailə və Sosial Xidmətlər Nazirliyi Türkiyə Böyük Millət Məclisi ilə birlikdə 13 yaşdan kiçik uşaqların smartfon istifadəsini məhdudlaşdırmaq üçün iş görür. 

Hazırda sosial media proqramlarına və sosial şəbəkələrə girişi qadağan etmək məqsədilə “İnternetdə yayımlanan nəşrlərin tənzimlənməsi və bu nəşrlər vasitəsilə törədilən cinayətlərlə mübarizə haqqında” Qanuna dəyişikliklərin edilməsi məqsədilə araşdırma aparılır. 

Akademik Tuncay Dilçi bir çox ölkələrdə 13 yaşdan kiçik uşaqlar üçün smartfonların qadağan edildiyini bildirərək, Türkiyədə də oxşar təcrübənin gündəmə gətirilməsini təklif edib. "Əgər uşağın “təhlükəsizlik” zəifliyi və ya problemi varsa, bu uşaqlar üçün təhlükəsizliyin təmini və ünsiyyət məqsədi ilə düyməli telefonlardan istifadə edilməlidir". 

Qəzet Ailə və Sosial Xidmətlər Nazirliyinin uşaqların sosial media və sosial şəbəkələrdən istifadəsi ilə bağlı dünya təcrübələrini də təqdim edib. 

Qeyd edilib ki, Çində 16 yaşından kiçik uşaqların valideynlərinin icazəsi ilə sosial media hesabı açması tələb olunur. ABŞ-ın bəzi ştatlarında 14 yaşdan kiçik şəxslərin sosial mediadan istifadəsini qadağan edən qanun təsdiqlənib. Bu qanun 2025-ci ildən qüvvədə olacaq.

Fransada yaşı 15-dən kiçik olanlar valideynlərinin icazəsi ilə sosial şəbəkələrdən istifadə etməlidirlər. Cənubi Koreyada 16 yaşından kiçik uşaqların gecə saat 00.00-dan 06.00-a qədər onlayn oyun oynaması qadağandır.

Böyük Britaniya və Rusiyada yaşı 13-dən aşağı olanlar yalnız onlayn platformalarda hesab aça bilirlər. İtaliyada 14 yaşından kiçik şəxslərin mobil telefona sahib olması, 16 yaşından kiçiklərin isə sosial şəbəkələrdə profil açması qadağandır. Avstraliyada yaşı 14-dən kiçik olanlar üçün sosial media qadağası var. Qadağaya əməl etməyənlərə qarşı ciddi cəzalar və sanksiyalar tətbiq olunur. Yunanıstan da uşaqların sosial mediadan istifadəsi ilə bağlı araşdırma aparır. İrlandiyada yaşı 16-dan aşağı olanların smartfonlardan istifadəsinə tam qadağa qoyulması müzakirə olunur.