“Respublika fənn müsabiqələri 2015-ci ildən etibarən VI-VII sinif şagirdləri arasında keçirilir”.

“Azərbaycan müəllimi” xəbər verir ki, bunu Təhsil İnstitutunun direktor müavini Fuad Qarayev respublika fənn müsabiqələri qaliblərinin bu gün Bakı Ali Neft Məktəbində keçirilən mükafatlandırılma mərasimində deyib.

Onun sözlərinə görə, qalib şagirdlər lisey və gimnaziyalara müsabiqədənkənar daxil olmaq imkanı qazanırlar ki, bu da müsabiqənin əsas üstünlüklərindəndir. Onlar həmçinin beynəlxalq olimpiadalara hazırlıq mərkəzlərinə cəlb edilirlər.

F.Qarayev müsabiqədə ümumilikdə 43 111 şagirdin iştirak etdiyini açıqlayıb: “Yarımfinal mərhələsinə vəsiqə qazanan şagirdlərin sayı 8800 nəfər olub. Respublika üzrə 307 şagird respublika fənn müsabiqəsinin qalibi adını qazanıb”.

F. Qarayev əlavə edib ki, onlardan 58 nəfər qızıl, 95 nəfər gümüş, 154 nəfər bürünc medala layiq görülüb:

“Sevindirici haldır ki, hər il müsabiqələrdə iştirak edən qızların sayı artır. Bu il qaliblərdən 189 nəfəri oğlan, 118 nəfəri qız olub”.

Elm və Ttəhsil nazirinin müavini Firudin Qurbanov müsabiqənin əhəmiyyəti, təhsilin inkişafına verdiyi töhfələr barədə danışıb. 

O, bu müsabiqələrin istedadlı şagirdlərin üzə çıxarılması və ölkəmizin gələcək elmi kadr potensialının formalaşması baxımından xüsusi önəm daşıdığını vurğulayıb. Çıxışının sonunda şagirdlərin bu cür bilik yarışları ilə yalnız elm deyil, dünyagörüşü qazandıqlarını da bildirərək qalibləri təbrik edib, onlara gələcək həyatlarında uğurlar arzu edib.

Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva bu cür tədbirlərin şagirdləri gələcəyə stimullaşdırdığını vurğulayaraq, bu yarışlarda yalnız qalibiyyətin deyil, iştirakın də əhəmiyyətli olduğunu bildirib.

Daha sonra mükafatlandırma mərasiminə ev sahibliyi edən Bakı Ali Neft Məktəbinin rektoru Elmar Qasımov şagirdləri təbrik edib.