Bu gün cəmiyyətimizin ən həssas üzvlərinin - xüsusi qayğıya ehtiyacı olan insanların günüdür. "Azərbaycan müəllimi" olaraq, bu əlamətdar gün münasibətilə qayğıya ehtiyacı olan uşaqlar üçün yaradılan Mingəçevir Uşaq və Ailələrə Dəstək Mərkəzinə baş çəkdik. 2005-ci ildə "Uşaqların Xilası” Təşkilatının yaratdığı mərkəzin tək valideynli, valideyn himayəsindən qismən və ya tam məhrum olmuş, sağlamlıq imkanları məhdud, məcburi köçkün ailələrinin uşaqlarına, eləcə də risk qrupuna aid olan uşaqlara təmənnasız xidmət göstərir.

Mərkəzin direktoru Aygün Fərruxovanın sözlərinə görə, rəhbərlik etdiyi qurum 2009-cu ildən Elm və Təhsil Nazirliyinin tabeliyində fəaliyyət göstərir: “Əsas məqsədimiz xüsusi qayğıya ehtiyacı olan uşaqların sosial inteqrasiyasını təmin etmək, onların təhsil və tərbiyəsinə dəstək olmaqdır. Hər bir uşağın fərdi xüsusiyyətlərini nəzərə alaraq onların potensialını üzə çıxarmağa çalışırıq. Uşaqlarımızın sevinci və uğurları bizim ən böyük mükafatımızdır”.

Mərkəzin müəllimi Elnarə Səmədova uşaqların sağlam inkişaf etməsi üçün əlindən gələni etməyə çalışır: “Uşaqlarımızın müayinə və müalicələrini təşkil etmək üçün bacardığımı edirəm. Müxtəlif reabilitasiya mərkəzlərində onların müalicələrini, hətta cərrahi əməliyyatlarını etdirməyə çalışıram. Bu yolda çətinliklərlə qarşılaşsaq da, uşaqlarımızın sağlamlığı naminə onları dəf etməyə səy göstəririk”.

Elnarə xanım deyir ki, uşaqların müasir biliklərə yiyələnməsi üçün kompüter və ingilis dili dərnəkləri yaradıblar. Bu dərnəklər onların dünyagörüşünü genişləndirir və gələcəkdə daha geniş imkanlara sahib olmalarına kömək edir: “Müxtəlif ekskursiyalar və gəzintilər təşkil edirik. Bununla uşaqlarımızın sosial bacarıqları inkişaf edir, dünyagörüşləri genişlənir. Valideynlərin iştirakı ilə keçirilən tədbirlər valideyn-müəllim birliyini möhkəmləndirir”.

Reabilitasiya məşğələləri uşaqların motor bacarıqlarını inkişaf etdirir

Reabilitasiya üzrə müəllim Könül Qayıdova uşaqların fiziki inkişafına dəstək olur: “Hər bir uşaqla onların fərdi ehtiyaclarını nəzərə almaqla işləyirik. Reabilitasiya məşğələləri onların motor bacarıqlarını inkişaf etdirir, özünəinamlarını artırır. Müxtəlif məşqlər və terapiya üsulları ilə uşaqların fiziki məhdudiyyətlərini aradan qaldırmağa çalışırıq”.

Loqoped Kamil Yusibov isə nitq pozuntuları olan uşaqlarla çalışır. Onun sözlərinə görə, uşaqların nitq qabiliyyətlərini inkişaf etdirmək üçün müasir metodlardan istifadə edir. Onların ünsiyyət bacarıqlarını artırmaq məqsədilə oyunlardan, interaktiv məşğələlərdən və xüsusi təlim proqramlarından faydalanır. Məqsəd onların cəmiyyətlə daha rahat ünsiyyət qurmasına yardım etməkdir.

Burada uşaqlar həm də sosiallaşırlar

Uşaq və Ailələrə Dəstək Mərkəzində uşaqların qidalanması xüsusi diqqət mərkəzindədir. Burada uşaqlar səhər, ikinci səhər, günorta yeməyi yeyir və qəlyanaltılarla təmin olunurlar.

Bu, onların sağlam böyüməsinə və inkişafına mühüm töhfə verir.

Mərkəzdə uşaqlar üçün mütəmadi olaraq əyləncəli tədbirlər, yarışlar və müsabiqələr təşkil olunur, keçirilən rəsm müsabiqələri, şeir yarışmaları, idman tədbirləri onların yaradıcılıq və fiziki bacarıqlarını inkişaf etdirir. Təşkilatın Mingəçevir Dövlət Dram Teatrı, Mingəçevir Gənclər Evi və digər qurumlarla sıx əməkdaşlığı sayəsində görülən tədbirlər uşaqların sosiallaşmasına və mədəni inkişafına töhfə verir. Tədbirlərdə iştirak edən xeyriyyəçi insanlar uşaqlara maddi və mənəvi dəstək göstərirlər.

Mərkəzin psixoloqu Reyhan Allahverdiyeva uşaqların emosional və psixoloji sağlamlığına diqqət yetirir. Onun keçirdiyi fərdi və qrup məşğələləri uşaqların sosial adaptasiyasına və daxili dünyalarının zənginləşməsinə kömək edir.

Mərkəzdə fəaliyyət göstərən dərnəklər uşaqların bacarıqlarını inkişaf etdirir. Buradakı toxuculuq dərnəyində uşaqlar toxuculuq sənətini öyrənir, əl işləri hazırlayır, “Bacarıqlı əllər” dərnəyində sənətkarlıq fəaliyyətləri ilə məşğul olurlar. Kompüter dərnəyində isə kompüter biliklərinə yiyələnir, müasir texnologiyadan istifadə etməyi öyrənirlər. İngilis dili dərnəyi uşaqların xarici dil bacarıqlarını artırır.

Mərkəzin həkimi Şəlalə Quliyeva və tibb bacısı Aynurə Zeynalova uşaqların sağlamlığını daim nəzarətdə saxlayırlar. Onlar uşaqları mütəmadi olaraq, müayinələrdən keçirir, lazım olduqda müalicə olunmasını təmin edirlər.

Dərnəklərin məzunları arasında ali və orta ixtisas təhsillilər də var

Mərkəzin dərnəklərinin bir çox məzunları hazırda ali və orta ixtisas təhsili alır, müxtəlif peşələrə yiyələniblər. Məzunlar arasında yanğınsöndürən, xilasedici, mühafizəçi, musiqiçi, rəssam, usta, maliyyə mütəxəssisi kimi çalışan peşə sahibləri də var.

Fidan Yusifzadə voleybol üzrə respublikanın birinci dərəcəli idmançısıdır və hazırda Azərbaycan İdman Akademiyasında təhsil alır.

Mərkəzin müxtəlif yarışlarında, təlimlərində iştirak edərək sertifikat və fəxri fərmanlar qazanan 21 yaşlı Fidanın sözlərinə görə, 8 yaşından idmanla - atletika, üzgüçülük, futbol, həndbol, basketbol ve voleybolla məşğuldur.

Mingəçevir Uşaq və Ailələrə Dəstək Mərkəzinin fəaliyyəti bir daha göstərir ki, sevgi, fədakarlıq və həssas yanaşma ilə hər bir maneəni aşa bilərik. Burada çalışan müəllimlər və əməkdaşlar, uşaqların həyatını işıqlandırmaq üçün yorulmadan çalışırlar. Onların əməyinin nəticəsi olaraq, uşaqlar gələcəyə ümidlə baxır, cəmiyyətin fəal və faydalı üzvləri kimi yetişirlər.*