Avqustun 25-də Azərbaycan Dövlət Pedaqoji Universitetinin (ADPU) Amerika Birləşmiş Ştatlarının nüfuzlu ali təhsil müəssisələrindən olan Corc Vaşinqton Universiteti (CVU) ilə birgə həyata keçirdiyi ikili diplom magistr proqramına qəbul üçün müraciət etmiş magistrantların müsahibə mərhələsinə start verilib.

Bu barədə universitetdən “Azərbaycan müəllimi”nə məlumat verilib. Bildirilib ki, müsahibələr CVU-nun Təhsil və İnsan İnkişafı Məktəbinin dekan müavinləri Sevinc Məmmədova (CVU tərəfdən ikili diplom proqramının direktoru) və Natali Milman tərəfindən aparılır.

ADPU-nun rektoru professor Cəfər Cəfərov və tədris işləri üzrə prorektor dosent Eldar Aslanov müsahibələrin gedişi ilə tanış olublar.

Həftə ərzində davam edəcək müsahibə mərhələsinin nəticələrinə əsasən 15-30 arası magistrantın proqrama qəbul olunması gözlənilir.

Proqrama qəbul olunacaq tələbələr ADPU-nun "Təhsil menecmenti", CVU-nun isə "Təhsil siyasəti və insan inkişafı" ixtisasları üzrə magistr dərəcələrinə alacaqlar.

Qeyd edək ki, “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” əsasında 2020-ci ildən etibarən uğurla həyata keçirilən proqramdan indiyədək 122 nəfər məzun olub. 

Proqram tam şəkildə Azərbaycan Respublikasının Dövlət Neft Fondu tərəfindən maliyyələşdirilir.