Dünya Bankı Pakistanın Pəncab əyalətində ibtidai təhsilin keyfiyyətini yüksəltmək məqsədilə 47,9 milyon dollarlıq qrant təsdiqləyib. 

“Azərbaycan müəllimi” xəbər verir ki, qrant Qlobal Təhsil üzrə Tərəfdaşlıq Fondu (Global Partnership for Education Fund) tərəfindən maliyyələşdirilir.

Yeni layihə 4 milyondan çox uşağa fayda verəcək. Proqram çərçivəsində ibtidai təhsilin əhatəsi genişləndiriləcək, məktəbdən kənarda qalan uşaqlar təhsilə cəlb olunacaq, müəllimlərin peşəkar dəstəyi gücləndiriləcək və sektorun iqlim dəyişiklikləri və fövqəladə hallara qarşı dayanıqlığı artırılacaq.

Layihənin rəsmi adı “Nəticələrə nail olmaq: Pəncabda keyfiyyətli təhsil xidmətlərinə çıxış, çatdırılma və sistem transformasiyası”dır. Burada əsas məqsəd təhsildə bərabər imkanların yaradılması, təməl biliklərin gücləndirilməsi və uzunmüddətli insan kapitalının inkişafına töhfə verməkdir.

Proqram çərçivəsində:
– 80 min uşaq təhsilə qaytarılacaq,
– 3 milyondan çox şagird Pəncab Təhsil Departamentinin məktəblərində fayda əldə edəcək,
– Təxminən 850 min uşaq qeyri-formal təhsil sektorunda dəstəklənəcək,
– 140 min xüsusi qayğıya ehtiyacı olan uşaq isə xüsusi təhsil məktəblərində daha yaxşı imkanlarla təmin ediləcək.

Eyni zamanda 100 mindən çox müəllim və məktəb rəhbəri peşəkar inkişaf proqramlarına cəlb olunacaq, valideynlər və icma üzvləri üçün də maarifləndirici təşəbbüslər həyata keçiriləcək.