Respublika fənn olimpiadalarında medallar qazanaraq qalib olan bu gənclər Qarabağ Universitetini seçiblər. Onlarla görüşümüz maraqlı notlar üzərində kökləndi. Bu gənclərlə yaxından tanış olaq. İlk müsahibim Pəri Bağırovadır. 

Pəri xanım söyləyir ki,  Qarabağı filmlərdə görsə, onun haqqında kitablarda oxusa da, buranı çox sevib. Ötən il burada universitet açılanda qəti qərarını verib ki, orta məktəbi bitirən kimi yüksək balla bu universitetə daxil olsun. 

Niyyəti hara, mənzili də ora imiş. O, bu universitetə müsabiqədənkənar qəbul olub:

“Hələ də inana bilmirəm ki, mən artıq bu universitetin tələbəsiyəm. Çox sevinirəm, həm də çox... Lap uşaqlıqdan müəllim olmaq arzusunda olmuşam. Bu təhsil ocağında “Azərbaycan dili və ədəbiyyat müəllimliyi” ixtisasını da özüm seçmişəm”.

Pəri Salyan rayonunun A.Nağıyev adına Dayıkənd kənd tam orta məktəbini bitirib: “Gələcəkdə daha çox uğurlar qazanaraq dünyada tanınmaq istəyirəm”.
Pəri əlavə edir ki, müəllimlik peşəsi onun üçün uca zirvədir: “Müəllim gənclərin formalaşmasında böyük rol oynayır. RFO-da qalib olmağım da bu peşəni seçməyimə təkan oldu. Yol uzaqlığı olsa da, Qarabağa qəlbən bağlılığım məsafələrə əngəl deyil. Valideynlərim də bu istəyimə qarşı çıxmadılar, yanımda oldular. Sevinirəm ki, arzuma çatmışam”.

İndi görək, uğuru ilə valideynlərini sevindirən Uğur Kərimli nə deyir?

“Olimpiadada medal qazananda sevincimin həddi-hüdudu olmadı. Gələcəkdə tariximizi araşdırmaq üçün “Tarix müəllimliyi” ixtisasını seçdim. Tarix mənim üçün bir hobbidir, boş vaxtlarımda belə tarixi təkrar-təkrar oxuyuram. Əslən Qərbi Azərbaycandan olduğumdan uşaqlıqdan Göycənin, Zəngəzurun həsrəti ilə yaşamışam. Bu torpaqlara gedən yol Qarabağdan keçdiyindən Qarabağa sevgim sonsuzdur. Qarbağ Universitetində oxumaq uşaqlıq arzum olduğundan xəyallarım gerçək olub. Elə bilirəm ki, dədə-baba torpaqlarıma bir addım yaxınlaşmışam”.

Xədicə Dünyamalıyeva Neftçala rayonunun Aşağı Surra kəndində anadan olub. Həmin kənddə Z.Əsgərov adına tam orta ümumtəhsil məktəbində təhsil alıb. O, təhsil illərində fənn olimpiadalarında inşa müsabiqələrində müxtəlif yarışlarda iştirak edib.  

İxtisas seçimini də özü edib. Tarixlə bağlı bilgilərini dərinləşdirərək gələcəkdə daha böyük uğurlar qazanacağına inanır.

Xədicə Qarabağ Universitetinin gələcəkdə dünyanın ən nüfuzlu elm və təhsil müəssisələrindən birinə çevriləcəyinə düşündüyünü, Qarabağın onun üçün təkcə coğrafi məkan deyil, tarixi və mənəvi dəyər olduğunu, ikinci şans verilsəydi, yenə də Qarabağ Universitetini seçəcəyini söyləyir.

Vaqif Rzayev də Neftçala rayonunun Aşağı Surra kəndində doğulub. O da Z.Əsgərov adına Aşağı Surra kənd tam orta məktəbini bitirib. 

Vaqif Rzayev bu universitetin dünyanın diqqət mərkəzində olduğunu bildirir. Belə bir universitetdə oxumağı qürur hesab edir. Universiteti bitirdikdən sonra pedaqoq kimi fəaliyyət göstərəcəyini söyləyir.