26 oktyabr 2024-cü il tarixində Ağsu Rayon Təhsil Sektorunda  Elm və Təhsil Nazirliyinin Təhsildə inkişaf və innovasiyalar üzrə VIII qrant müsabiqəsi çərçivəsində icra edilən “Duolingo ilə ingilis dilini asan və səmərəli öyrən!” adlı layihənin təqdimat mərasimi keçirilib. 

“Azərbaycan müəllimi” xəbər verir ki, “Duolingo ilə ingilis dilini asan və səmərəli öyrən!” adlı layihə çərçivəsində təşkil olunmuş tədbirdə Dağlıq Şirvan Regional Təhsil İdarəsi Ağsu rayon sektorunun əməkdaşları, layihə rəhbəri Aynur Nemətova, layihə üzrə ekspert Ziba Məmmədova və Ağsu rayon təhsil ictimaiyyətinin nümayəndələri iştirak ediblər.       

Layihə rəhbəri Ağsu şəhər 3 nömrəli tam orta məktəbin ingilis dili müəllimi Aynur Nemətova layihənin məqsədi və layihə çərçivəsində həyata keçirilən işlər barədə ətraflı məlumat verib. O, qeyd edib ki, "Layihə çərçivəsində V-VIII sinif şagirdlərinin ingilis dili biliklərini möhkəmləndirmək, onların ingilis dilində oxumaq, yazmaq, dinləyib-anlamaq bacarıqlarını inkişaf etdirmək kimi hədəf istiqamətləri müəyyən edilib. Layihənin icrası zamanı “Duolingo ilə ingilis dilini asan və səmərəli öyrən!” adlı 3 aylıq öyrədici kursun təşkili nəzərdə tutulub". 

O, həmçinin layihə çərçivəsində Ağsu şəhər 3 nömrəli tam orta məktəbdə 3 aylıq ingilis dili kursunun təşkil olunacağını, kursda təhsil alan 15 şagirdin test imtahanının nəticələrinə əsasən, seçiləcəyini vurğulayıb: “15 məktəblinin iştirak etdiyi ingilis dili kursunun fəaliyyət planına uyğun olaraq müdavimlərə "People", "Lifestyle", "Professions", "Travelling"  bölmələri üzrə müvafiq bilik və bacarıqlar öyrədiləcəkdir. Kursda hər 4 dərsdən bir 90 dəqiqəlik test imtahanı keçiriləcək və tədrisin nəticələri ekspertlər tərəfindən dəyərləndiriləcək. Layihənin bağlanış tədbirində 3 aylıq kursu bitirən müdavimlərə göstərdikləri nəticələrə müvafiq olaraq diplom və sertifikatlar təqdim ediləcək. 3 aylıq ingilis dili kursunda ingilis dilində oxumaq, yazmaq, dinləyib-anlamaq bacarıqları inkişaf etdiriləcək”.

Sonda tədbir iştirakçıları ilə mövzu ətrafında fikir mübadiləsi aparılıb, iştirakçıları maraqlandıran suallar cavablandırılıb.