Azərbaycan Dövlət Aqrar Universitetində (ADAU) ali təhsilin magistratura səviyyəsi üzrə yeni təhsil proqramlarının hazırlanması məqsədilə ixtisas kafedralarının və professor-müəllim heyətinin nümayəndələri ilə geniş tərkibli görüş keçirilib.

Universitetdən “Azərbaycan müəllimi"nə bildirilib ki, iclasda çıxış edən Universitetin rektoru Zəfər Qurbanov Elm və Təhsil Nazirliyində həyata keçirilmiş genişmiqyaslı müzakirələrin nəticələri barədə ətraflı məlumat verərək, yeni təhsil proqramlarının hazırlanmasında bu müzakirələrin əhəmiyyətini vurğulayıb. O, təhsil sistemində innovativ yanaşmaların tətbiqinin vacibliyini və proqramların daha əmək bazarına və beynəlxalq standartlara uyğun olmasının zəruriliyini qeyd edib.

Tədris şöbəsinin müdiri, dosent Elay Zeynallı yeni təhsil proqramlarının kompetensiya əsaslı və tələbəyönümlü şəkildə hazırlanması məqsədilə qarşıda duran məsələlərə diqqət çəkib.

İclasda professorlar Nizami Seyidəliyev, Qənbər Abdullayev, Həsənəli Aslanov, əməkdar müəllim Hüseyn İdrisov, dosentlər Zahir Ələsgərov və Vüqar Bəşirov çıxış edərək müzakirə olunan mövzu ilə bağlı öz fikirlərini bildiriblər. Hər bir iştirakçı təhsil proqramlarının inkişafı və təkmilləşdirilməsi üçün müxtəlif yanaşmalar, təkliflər və təcrübələrini bölüşüb, bu cür təşəbbüslərin təhsil sahəsindəki yenilikləri və təkmilləşmələri sürətləndirəcəyinə inandıqlarını ifadə ediblər.