10 sentyabr tarixində Azərbaycan Respublikasının Təhsil İnstitutunda (ARTİ) 2025-ci il fəlsəfə doktoru proqramı üzrə doktoranturaya qəbul imtahanlarının sonuncu mərhələsi olan ixtisas fənnindən imtahanlar təşkil olunub.

ARTİ-dən “Azərbaycan müəllimi”nə bildirilib ki, doktorantura səviyyəsində təhsil almaq üçün sənəd təqdim edən namizədlər xarici dil və fəlsəfə fənlərindən keçirilən imtahanlarda yüksək nəticələr göstərərək ixtisas fənni imtahanına keçid hüququ qazanıblar. Ümumilikdə, bu mərhələdə 12 nəfər iddiaçı iştirak edib.

Qəbul imtahanlarını keçirmək üçün institutun direktoru səlahiyyətlərini icra edən Elnur Əliyevin sədrlik etdiyi, ARTİ-nin direktor müavini, pedaqogika üzrə fəlsəfə doktoru, dosent İlham Cavadovun, Elmi-pedaqoji kadrların hazırlanması şöbəsinin müdiri, pedaqogika üzrə elmlər doktoru, professor Hümeyir Əhmədovun üzvlük etdiyi daimi imtahan komissiyası yaradılıb.

İmtahanlar Təlim və tərbiyənin nəzəriyyəsi və metodikası, Təhsilin təşkili və planlaşdırılması, Ümumi pedaqogika, pedaqogika və təhsilin tarixi, Pedaqoji psixologiya ixtisasları üzrə 6 komissiyada keçirilib.

Yekun olaraq qeyd edək ki, ixtisas fənni imtahanları doktoranturaya qəbul prosesinin ən önəmli mərhələlərindən biridir və bu mərhələdə uğur qazanan namizədlər fəlsəfə doktoru proqramında elmi fəaliyyətlərini davam etdirərək ölkəmizin elmi potensialının güclənməsinə töhfə verəcəklər.