“QS 2026 dünyanın ən yaxşı universitetlərinin reytinqi”ndə Azərbaycan universitetlərinin sayının artması ölkəmizin ali təhsilində tarixi bir mərhələdir.  

Bunu "Azərbaycan müəllimi"nə açıqlamasında Bakı Dövlət Universitetinin rektorunun müşaviri, iqtisad elmləri üzrə fəlsəfə doktoru Asiman İlyasov söyləyib. 

O bildirib ki, “QS 2026 dünyanın ən yaxşı universitetlərinin reytinqi”ndə ölkəmizin 9 universitetinin yer alması, onlardan altısının ilk dəfə bu nüfuzlu reytinqə daxil olması artıq ali təhsil müəssisələrimizin dünya səviyyəsində qəbul olunmasının göstəricisidir: “Bakı Dövlət Universiteti 688-ci yerə yüksələrək sadəcə ölkə üzrə deyil, həm də Cənubi Qafqaz regionu üzrə ən yüksək nəticəni göstərib və 300 pilləyə yaxın irəliləyiş əldə edib. BDU-nun bu uğuru universitetdə son illərdə həyata keçirilmiş məqsədyönlü islahatların – elmi fəaliyyətin gücləndirilməsi, idarəetmənin beynəlxalq standartlara uyğunlaşdırılması, sənaye və texnoloji tərəfdaşlıqların inkişafı, rəqəmsal transformasiya və insan kapitalına yönəlmiş strateji yanaşmaların real nəticəsidir”. 

Asiman İlyasov deyir ki, eyni zamanda yeni daxil olan universitetlərin sayına görə Azərbaycanın 106 ölkə arasında 2-ci sırada olması da ali təhsil sistemində son illərdə aparılan islahatların effektivliyini və beynəlxalq rəqabət qabiliyyətinin artdığını sübut edir. Azərbaycan universitetlərinin dünya reytinqlərində irəliləməsi və sayının artması ölkə ali təhsil sisteminin ümumi inkişafının mühüm göstəricisidir. Bu uğur yalnız ayrı-ayrı universitetlərin deyil, bütövlükdə milli təhsil siyasətinin düzgün istiqamətdə qurulduğunun və məqsədyönlü islahatların nəticə verdiyinin sübutudur. 

Müşavirin sözlərinə görə, reytinq göstəriciləri akademik və işəgötürən nüfuzu, elmi və innovasiya potensialı, məzunların məşğulluğu, beynəlmiləlləşmə səviyyəsi və dayanıqlılıq kimi əsas indikatorlarla universitetlərin inkişaf səviyyəsini obyektiv qiymətləndirməyə imkan yaradır. 

“Qeyd edək ki, “Azərbaycan Respublikasının 2022–2026-cı illərdə sosial-iqtisadi inkişaf strategiyası”nda ölkənin ən azı üç universitetinin dünyanın TOP 800-lüyündə yer alması strateji hədəf kimi müəyyən edilib. Və onu da bildirim ki, BDU artıq bu hədəfə çataraq ölkənin ali təhsil sahəsində beynəlxalq səviyyədə tanınmasına və rəqabətədavamlı mövqeyinin güclənməsinə əhəmiyyətli töhfə verib. Digər universitetlərimizin də bu yüksəliş trendini davam etdirəcəyinə və qlobal reytinqlərdə daha geniş təmsil olunacağına inamımız böyükdür”.